Hungaria spiunoi zyrtarët e BE-së, raportojnë mediat belge
Një raport i përbashkët pretendon se inteligjenca hungareze kontrolloi dhomat e hoteleve të zyrtarëve të BE-së dhe vodhi të dhëna nga laptopët.
Shërbimi inteligjent i Hungarisë spiunoi zyrtarët e BE-së që vizituan Budapestin duke kërkuar dhomat e tyre të hotelit dhe duke shkarkuar informacion nga laptopët, pretendon një raport i përbashkët nga gazeta belge De Tijd dhe OJQ-ja hungareze Direkt36.
Raporti thotë se agjencia hungareze e spiunazhit Információs Hivatal (IH) gjithashtu ka mbledhur informacion nga qytetarët hungarez që punojnë në institucionet e BE-së, ose duke i detyruar ata të bashkëpunojnë ose duke i spiunuar pa dijeninë e tyre.
Ndërsa shqetësimet rreth spiunazhit që synon institucionet e BE-së nuk janë asgjë e re, këto raporte janë të jashtëzakonshme sepse kanë të bëjnë me spiunimin e pretenduar nga një shtet anëtar i BE-së dhe jo me kundërshtarë më të parashikueshëm si Rusia dhe Kina.
Spiunazhi i supozuar shtrihet disa vite më parë, megjithëse zyrtarë nga institucionet e BE-së dhe shtetet anëtare kanë udhëtuar në kryeqytetin hungarez më shpesh se zakonisht në muajt e fundit, sepse vendi mban ‘presidencën’ e rradhës të Këshillit të BE-së. Përgjegjësia për rolin ndryshon çdo gjashtë muaj, me vendet anëtare që kryesojnë me radhë diskutimet ministrore dhe organizojnë takime të ndryshme të nivelit të lartë në vendin e tyre.
De Tijd raporton se “pothuajse një divizion i tërë brenda IH është krijuar” për të monitoruar institucionet e BE-së. Gazeta në gjuhën flamande citon “disa burime të njohura me punën e brendshme të shërbimit inteligjent hungarez”.
Raporti detajon mbikëqyrjen e synuar të hetuesve nga zyra kundër mashtrimit të BE-së, OLAF, gjatë viteve 2015-2017. OLAF po hetonte keqpërdorimin e mundshëm të fondeve të BE-së dhe dërgoi zyrtarë në Hungari katër herë. Oficerët hungarezë të inteligjencës regjistruan telefonatat e hetuesve të OLAF-it, i ndoqën ata përreth dhe spiunuan takimet private.
Raporti thotë se hetuesit e OLAF vunë re se ata po ndiqeshin gjatë udhëtimeve me makinë. Organizata kundër mashtrimit të BE-së nuk pranoi t’i përgjigjet pyetjeve të De Tijd në lidhje me këtë çështje.
Në shënjestër nuk ishte vetëm OLAF, “sipas burimeve tona, ka pasur periudha kur pothuajse të gjitha delegacionet e BE-së që vizitonin Hungarinë janë spiunuar”, raporton De Tijd.
Euractiv nuk i ka verifikuar në mënyrë të pavarur pretendimet e publikuara në De Tijd, por ka kontaktuar qeverinë hungareze dhe Komisionin Evropian për koment.
“Ne nuk kemi të bëjmë me lajme të rreme”, tha qeveria hungareze.
Rruga Press