Haxhiu vlerëson mbështetjen e Gjermanisë për proceset evropiane të Kosovës

U.d. Presidentja e Republikës së Kosovës, Albulena Haxhiu, priti sot në takim ambasadorin e Republikës Federale të Gjermanisë në Kosovë, Rainer Rudolph, të cilin e falënderoi për mbështetjen e vazhdueshme të Gjermanisë ndaj Republikës së Kosovës në shtetndërtim, zhvillim demokratik dhe integrim evropian.

Sipas njoftimit për media, në takim u theksua rëndësia e partneritetit strategjik ndërmjet Kosovës dhe Gjermanisë, si dhe roli i veçantë që Gjermania ka pasur në momente kyçe për vendin.

U.d. Presidentja Haxhiu vlerësoi se Gjermania mbetet një nga aleatët më të rëndësishëm të Kosovës dhe theksoi përkushtimin për thellimin e bashkëpunimit në fusha me interes të përbashkët, përfshirë integrimin evropian, ekonominë, sigurinë, sundimin e ligjit, arsimin dhe zhvillimin e qëndrueshëm.

Sipas njoftimit për media, Haxhiu ritheksoi se Kosova mbetet e përkushtuar ndaj vlerave evropiane, demokracisë dhe bashkëpunimit me partnerët ndërkombëtarë, ndërsa vlerësoi mbështetjen e Gjermanisë si të rëndësishme për avancimin e mëtejshëm të Republikës së Kosovës në proceset evropiane dhe ndërkombëtare.

Rruga Press