Haxhiu për qeveritë e kaluara: E mësuan keq Beogradin që t’i thonë “po” për gjithçka
Ministrja e Drejtësisë, Albulena Haxhiu, ka thënë se qeveritë e kaluara e kanë mësuar keq Serbinë, duke i thënë “po” për gjithçka.
Haxhiu në një konferencë për media të mërkurën pas mbledhjes së Qeverisë, ka thënë se Qeveria aktuale po i vuan pasojat e veprimeve të qeverive të kaluara në raport me Beogradin.
“Qasja qe kanë pasur qeveritë e kaluara tani është problem edhe për ne sepse i kanë mësuar keq, çfarëdo që kanë thënë Serbia dhe Beogradi ata kanë thënë “po”, prandaj është sfidë derisa ne ta kemi shtrirjen e sundimit të Ligjit në secilin cep të Kosovës. Për herë të parë pozicioni i Kosovës në negociata me Serbinë është i dinjitetshëm sepse Qeveria e Republikës së Kosovës nuk ka lejuar mbajtjen e zgjedhjeve serbe në Kosovë, nuk ka lejuar referendumin dhe po ashtu tani jemi duke i vendosur masat e reciprocitetit që i bën secili vend normal”, ka thënë Haxhiu.
Ndërkaq, duke folur për djegien e dy veturave deri tani në veri të cilat kishin targa RKS, Haxhiu ka thënë se këto raste nuk do të ndalen së ndjekuri.
Haxhiu ka folur edhe për dorëheqjet e gjyqtarëve dhe prokurorëve serbë, duke thënë se ata nuk mund të rikthehen në punë .
“Personat të cilët dorëhiqen nuk mund të kthehen sërish në sistem. Pasi është goditje për sistemin e drejtësisë që një prokuror apo gjyqtar të dorëhiqet për shkak të dirigjimeve që i bëhen nga Vuçiqi”, është shprehur ministrja Haxhiu.
Ministrja e Drejtësisë, Albulena Haxhiu, ka thënë të mërkurën pas mbledhjes së Qeverisë së Kosovës se institucionet e drejtësisë në veri janë duke funksionuar dhe se qytetarët atje po i marrin shërbimet e nevojshme.
Haxhiu ka thënë se Këshilli Gjyqësor i Kosovës ka bërë plan për mënyrën e funksionimit.
“Institucionet në veri të vendit janë duke funksionuar, po vijojnë punët dhe qytetarët po i marrin shërbimet e tyre. KGJK-ja siç ka njoftuar ka bërë një plan. Në këtë drejtim më takon të them që gjykatat dhe prokuroria në veri po funksionon. Lëndët po trajtohen, qytetaret po i marrin shërbimet. Sfidë kanë qenë ditët e parë pasi ky rast mirëpo janë plotësuar këto vende dhe situata është duke vijuar sikurse edhe qendra e paraburgimit në Mitrovicë që po funksionon normalisht”, ka thënë Haxhiu.
Rruga Press