Haxhiu: Nuk ka pasur ndryshim të rendit të ditës, opozita po bllokon pa arsye

Kandidatja e Lëvizjes Vetëvendosje për kryetare të Kuvendit të Kosovës, Albulena Haxhiu, pas dështimit të radhës të seancës konstituive, ka hedhur poshtë pretendimet e opozitës se është ndryshuar rendi i ditës, duke thënë se gjithçka është bërë në përputhje me rregulloren e Kuvendit.
“Ata thonë që e keni ndryshuar rendin e ditës – kjo nuk qëndron. Kryesuesi i seancës në përpikëri, ashtu siç shkruan në Rregullore të Kuvendit, i është përmbajtur rendit të ditës. Ne nuk kemi bërë ndryshim të rendit të ditës. Kryesuesi është në përputhje të plotë me rregulloren e punës së Kuvendit. Edhe aktgjykimi e konfirmon që nuk ka pasur ndryshim të rendit të ditës”, tha Haxhiu.

Ajo reagoi edhe ndaj pretendimeve se mungon mocioni procedural për votimin e fshehtë, duke theksuar se Gjykata Kushtetuese nuk ka përcaktuar mënyrën e votimit – të hapur apo të fshehtë – dhe se propozimi për formimin e Komisionit është bërë në përputhje me praktikat parlamentare.

“E dyta, thonë që duhet mocion procedural për mocion të fshehtë – edhe kjo është e paqëndrueshme. Sepse Gjykata Kushtetuese ka thënë se nuk është e përcaktuar se a shkohet me votim të fshehtë apo të hapur. Është seanca e 35-të kur kryesuesi propozon formimin e Komisionit dhe 35 herë deputetët e opozitës kanë ardhur në seancë dhe nuk e di pse kanë ardhur, duke qenë se as nuk kanë votuar për, as nuk kanë abstenuar dhe as nuk kanë votuar kundër”, tha ajo.

Haxhiu kritikoi gjithashtu sjelljen e opozitës në seancë, duke theksuar se në një seancë konstituive nuk lejohet debat, ndonëse disa deputetë kanë marrë fjalën vazhdimisht.

“E shohim në seancë disa herë dhe flasin. Në seancën konstituive nuk ka debat, nuk lejohet debati,” përfundoi Haxhiu.

Rruga Press