Haradinaj – Kurtit pas largimit të Listës Serbe nga institucionet: Ndërprite shkatërrimin e vendit, ose të ndërpresim ne

Kryetari i AAK-së, Ramush Haradinaj, u ka bërë thirrje për qetësi qytetarëve në veri të Kosovës.

Ai ka thënë se është momenti i fundit që kryeministri Albin Kurti të reflektojë.

Bie në sy fakti se Ramush Haradinaj u tregua diplomat ndaj Listës Serbe, pavarësisht se me direktiva të Vuçiqit ata shpallën largim nga institucionet e Kosovës dhe me gjasë do të nxisin trazira, e ndërkohë u tregua “kërcënues” ndaj kryeministrit Kurti, i cili po ushtron sovranitetin e Kosovës në lidhje me vendimin për targat në Republikën e Kosovës.

Ndërkohë, Haradinaj ka theksuar se qytetarët në veri nuk duhen të bien pre e politikave “të gabuara”. Kjo thirrje vjen pavarësisht se trazirat në veri nuk po i nxisin qytetarët, por Lista Serbe me strukturat e saj paralele kriminale, të cilat po ushtrojnë trysni edhe mbi qytetarët serbë në veri të Kosovës.

“Me këtë rast, ftoj të gjithë qytetarët e Kosovës që jetojnë në veri të vendit, të përmbahen dhe të ruajnë qetësinë, duke mos rënë pre e politikave të gabuara. Kosova është shtet i të gjithëve, e nuk është në favorin e askujt destabilizimi i situatës, përpos atyre që ndjekin agjendat ruse. Sa i përket Kurtit, janë momentet e fundit që të reflektojë dhe të ndërprejë shkatërrimin e vendit, përndryshe do të jemi të detyruar ta ndërpremë ne, me të gjitha mjetet demokratike në dispozicion”, ka shkruar Haradinaj.

Rruga Press