Hapet banka e parë vendore në Leposaviq, merr pjesë kryeministri Kurti: Uron qytetarët për hapjen e degës së Bankës Ekonomike

Në qytetin e Leposaviqit u hap banka e parë vendore. Në ceremoninë e hapjes mori pjesë kryeministri i Kosovës, Albin Kurti, duke theksuar rëndësinë e këtij zhvillimi për sektorin financiar në rajon.

Kujtojmë se më 14 nëntor të këtij viti, në veriun e Mitrovicës, u hap “Banka Ekonomike”, e cila ishte banka e parë vendore që filloi operimin në këtë rajon. Po ashtu, më 19 dhjetor, u hap banka e dytë vendore, “Banka Private e Biznesit”, gjithashtu në Mitrovicën Veriore, në një ceremoni modeste.

Vlen të theksohet se në fillim të këtij viti, Banka Qendrore e Kosovës, si një nga institucionet e pavarura financiare, bazuar në Kushtëtutën e Kosovës e cila si valutë legale dhe zyrtare e njeh vetëm euron, mori vendim për ndalimin e operimit në institucionet financiare të Kosovës valuta të tjera, përfshirë këtu edhe dinarin.

Kurti ka publikuar disa pamje nga ceremonia, ku edhe ka uruar qytetarët për hapjen e bankës.

“Mbi 300 biznese janë hapur dhe afër 500 qytetarë nga komuniteti serb janë punësuar në veri të Kosovës gjatë vitit 2024. Sot, Banka Ekonomike e hapi degën e 33-të të saj në Kosovë, kësaj radhe në Leposaviq, duke ofruar shërbime moderne për biznese dhe qytetarë, e të cilat i ofron edhe në secilën pikë tjetër në Kosovë, vetëm se këtu tash me pajisje të reja të teknologjisë së fundit. Banka aktualisht ka pesë punëtorë, tre serbë e dy shqiptarë”, ka shkruar Kurti në Facebook.

Tutje, ai ka shkruar “Urime qytetarëve të Leposaviqit dhe punë të mbarë”.

Rruga Press