Gjykata Kushtetuese rrëzon vendimin – Pezullohet ligji që detyron studentët e mjekësisë të punojnë 5 vite brenda vendit

Gjykata Kushtetuese ka vendosur pranimin e kërkesës për pezullimin e ligjit për studentët e mjekësisë, i cili i detyronte të punonin për 5 vite në spitalet brenda vendit për t’u pajisur me diplomën, ose në të kundërt do t’u duhej të paguanin tarifën e plotë të studimit.

Në vendimin e bërë publik këtë të martë thuhet se Kushtetuesja pritet ta shqyrtojë në themel çështjen.

Ligji u dërgua për shqyrtim në Gjykatën Kushtetuese nga një grup deputetësh të Partisë Demokratike dhe përfaqësues të studentëve.

“Pranimin e kërkesës për pezullimin e zbatimit të ligjit nr. 60/2023 “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme” në institucionet publike të arsimit të lartë”, thuhet në vendimin e gjykatës.

Ligji i cili u kalua në parlament në muajin korrik detyron çdo student të mjekësisë të punësohet për një periudhë 3 deri në 5 vjeçare në spitalet brenda Shqipërisë që të pajiset me diplomë.

Në të kundërt, nëse zgjedh të largohet jashtë shtetit do të duhet të paguajë një tarifë prej 240 mijë lekë të reja për çdo vit studimi.

Prej disa javësh studentët e mjekësisë kanë bojkotuar mësimin dhe kanë kryer disa protesta për të kundërshtuar ligjin që i vendos përpara dy zgjedhjeve të detyruara.

Sipas tyre ky ligj cënon liritë dhe të drejtat e njeriut dhe ndaj kanë bërë dhe ankimimin në Gjykatën Kushtetuese.

Rruga Press