Gjermania, Franca dhe SHBA bien dakord se njohja e zonave separatiste “nuk do të mbetet pa përgjigje”
Kancelari gjerman Olaf Scholz, presidenti francez Emmanuel Macron dhe presidenti amerikan Joe Biden kanë rënë dakord që dekretet e presidentit rus Vladimir Putin që njohin dy rajone separatiste pro-Moskë në Ukrainë si të pavarura “nuk do të mbeten pa përgjigje”, tha zëdhënësi i kancelarit Scholz.
Në një deklaratë të hënën, zëdhënësi i Scholzit tha se kancelari gjerman foli me Bidenin dhe Macronin të hënën në mbrëmje për “situatën e përkeqësuar”, pasi Presidenti rus njohu zyrtarisht dy të ashtuquajturat Republika Popullore të Donetsk dhe Luhansk.
“Të tre palët ranë dakord se kjo lëvizje e njëanshme e Rusisë është një shkelje e qartë e Marrëveshjes së Minskut. Gjermania, Franca dhe SHBA-ja dënuan ashpër vendimin e presidentit rus. Kjo lëvizje nuk do të mbetet pa përgjigje,” tha zëdhënësi.
Scholzi, Bideni dhe Macroni shprehën solidaritetin e tyre me Ukrainën dhe përgëzuan reagimin e kujdesshëm të Ukrainës deri më sot, të udhëhequr nga presidenti Volodymyr Zelensky, shtoi ai.
“Partnerët ranë dakord të mos heqin dorë nga angazhimi i tyre ndaj integritetit territorial dhe sovranitetit të Ukrainës. Në të njëjtën kohë, do të bëhet çdo përpjekje për të parandaluar përshkallëzimin e mëtejshëm të situatës,” përfundoi zëdhënësi.
©Rruga Press