Gërvalla niset për në Strasburg, pritet të ketë takime me përfaqësues të shteteve anëtare në Këshillin e Evropës

Ministrja e Punëve të Jashtme dhe Diasporës, Donika Gërvalla, e ka filluar vizitën zyrtare në Strasburg të Francës.

Në njoftimin e lëshuar nga MPJD-së thuhet se do të mbajë takime me përfaqësues të shteteve anëtare në Këshillin e Evropës.

Gërvalla dje ishte edhe në Luksemburg ku mori pjesë në takimin e ministrave të Jashtëm të Evropës me shtetet e Ballkanit Perëndimor.

Ajo para mediave është shprehur se temë e diskutimit të sotëm beson se do të jetë zgjerimi i Bashkimit Evropian, dhe anëtarësimi i Ballkanit Perëndimor.

“Ne erdhëm këtu në Luksemburg për të biseduar dhe diskutuar për integrimin më tutje të Ballkanit Perëndimor në Bashkimin e Evropian, dhe jo vetëm të Ballkanit Perëndimor”.

“Besoj se kjo është tema kryesore të shohësh integrimin e gjithë Evropës e atyre vendeve që qëndrojnë me vlerat e Bashkimit Evropian, që mbështesin parimet evropiane të cilat nuk janë vetëm çështje politike, por ato janë edhe në aspektin e rritjes së sigurisë në Evropë në kohërat kur jemi duke u ballafaquar me agresionin e Rusisë ndaj Ukrainës”.

“Një Bashkim Evropian më i fortë, është një përgjigje më e mirë për t’iu përgjigjur sfidave të sotshme dhe të së ardhmes”, ka thënë Gërvalla.

Rruga Press