Forcat izraelite vrasin tre palestinezë në Bregun Perëndimor të pushtuar

Forcat izraelite kanë vrarë tre palestinezë në Bregun Perëndimor të pushtuar, duke përfshirë një të dyshuar për kryerjen e një sulmi me thikë.

Sipas Aljazeera, ministria palestineze e shëndetësisë tha se i mituri Sanad Abu Attiyeh, 17 vjeç dhe Yazeed al-Saadi, 23 vjeç, u qëlluan për vdekje gjatë një sulmi të ushtrisë izraelite në Jenin.

Ushtria izraelite gjithashtu qëlloi dhe vrau një palestinez i cili kreu një sulm me thikë në Gush Etzion në jug të qytetit të Betlehemit, ku plagosi katër izraelitë, të enjten. 30-vjeçari u identifikua si Nidal Jumaa Jaafra.

Në Jenin, 15 palestinezë të tjerë u plagosën nga municionet reale gjatë bastisjes së ushtrisë, raportojnë mediat lokale, me të paktën tre në gjendje kritike.

Ministria palestineze e shëndetësisë tha se ushtria hodhi gaz lotsjellës pranë spitalit publik Jenin, i cili depërtoi në departamentin e urgjencës dhe ndërpreu operacionet e tij.

Vrasjet vijnë mes tensioneve të rritura gjatë dy javëve të fundit në Izrael dhe Bregun Perëndimor të pushtuar përpara muajit të shenjtë të Ramazanit. Rreth 11 izraelitë, duke përfshirë tre oficerë policie, u vranë në tre sulme të veçanta brenda Izraelit nga palestinezët në një valë dhune të padëshmuar prej vitesh.

Rruga Press