Fermerët të pakënaqur me çmimin e grurit, kërkojnë kompensim nga shteti

Fermerët janë në sezonin e korrjes së grurit. Mbjelljet e dhjetorit u bën me çmime më të arsyeshme të naftës dhe imputeve bujqësore, por dora e dytë e plehërimit dhe korrja po kryhen me çmime shumë më të larta.

Pirro Jongari nga fshati Lumth i Lushnjes, ka vendosur që përkohësisht të mos e shesë grurin, pasi çmimi që i ofrojnë grumbulluesit, nuk e kënaq. 

“Kam 3 hektarë grurë, kam bërë 150 kuintal grurë. Me 45 e kërkojnë, unë me 23 lekë për kg më del kostoja e prodhimit. Të paktën të ishte 55 lekë. Po e magazinoj grurin në shtëpi”.

“Kur ka mungesë në tregje ndërkombëtare duhet të ishte më shtrenjtë. Duam që mos të kemi abuzime nga grumbulluesit që i caktojnë vetë çmimet”.

E nëse shteti nuk kontrollon dot grumbulluesit, një mënyrë për të shpëtuar fermerët është kompensimi i diferencës së çmimit të grurit. 

“Të hyjë shteti dhe të ndërmjetësojë apo të paguajë diferencën e çmimit për të mbajtur fermerin dhe për të mos dëmtuar industrinë”.

Shqipëria nuk ka subvencione për mbjelljen e grurit, ndryshe nga Kosova që paguan 474 euro për hektarë të mbjellë.  

Rruga Press