Bota

Fermerët polakë sërish në protestë, bllokojnë rrugët për në Varshavë

Fermerët polakë vendosën postblloqe në Poloni për të shprehur kundërshtimin e tyre ndaj importeve të produkteve bujqësore nga vendet e treta dhe masave të parashikuara në Marrëveshjen e Gjelbër të BE-së.

Më konkretisht, që prej muajit shkurt fermerët kanë mbyllur pikat kufitare me Ukrainën. Ata vetë ankohen për konkurrencën e pandershme, siç e quajnë ata, të shkaktuar nga produktet bujqësore ukrainase të importuara në BE pa detyrime. Këtë javë protestat e tyre u shtrinë deri në kufirin me Gjermaninë.

“Më shumë se 580 demonstrata janë planifikuar për sot në të gjithë Poloninë, në të cilat pritet të marrin pjesë pothuajse 70,000 njerëz”, thuhet në një deklaratë të policisë.

Lexo më shumë  Polonia do të shpenzojë rreth 2.5 miliardë dollarë për të siguruar kufirin e saj lindor, thotë Tusk

Fermerët kanë bllokuar kryesisht rrugët për në Varshavë dhe qytete të tjera të mëdha, si Krakov.

“Ne nuk do të ndalemi nëse kërkesat tona nuk plotësohen plotësisht”, thanë në një deklaratë organizatorët e protestave.

Pas pushtimit rus në vitin 2022, Ukraina pa rrugët e saj kryesore të eksportit përmes Detit të Zi të bllokoheshin dhe sektori i saj bujqësor u paralizua. Për të ndihmuar Kievin, Brukseli pezulloi në vitin 2022 vendosjen e tarifave për produktet ukrainase që kalonin përmes BE-së.

Megjithatë, për shkak të problemeve logjistike dhe të tjera, një pjesë e madhe e këtyre produkteve, të destinuara për vendet e treta, mbetën në Poloni.

Lexo më shumë  Qeveria Rama dështon me menaxhimin e mbetjeve, BE konstaton problemet e menaxhimit te qeveria

Bllokada e kalimeve kufitare dhe mosmarrëveshjet për grurin ukrainas po tensionojnë marrëdhëniet midis Varshavës dhe Kievit, megjithëse Polonia e ka mbështetur fort fqinjin e saj që nga pushtimi rus.

Protestat e fermerëve polakë janë pjesë e një konteksti më të përgjithshëm të mobilizimeve nga kolegët e tyre në shumë vende të tjera evropiane.

BE-ja ka paraqitur propozime për të reformuar disa nga rregullat e përcaktuara në Politikën e Përbashkët Bujqësore me synimin për të qetësuar fermerët. Këto reforma mbeten për t’u diskutuar midis Shteteve Anëtare dhe Parlamentit Evropian.

Rruga Press

YouTube player