Eurodeputeti Mandl: Është dialog mes shtetit të Kosovës dhe Serbisë, jo Prishtinës dhe Beogradit

Eurodeputeti Lukas Mandl ka thënë se Serbia ka bërë gabim të madh dhe se për këtë e gjithë bota po shikon drejt asaj.

Mandl në një intervistë tha se Serbia ka bërë gabim të madh që është rreshtuar në anën e kundërt të perëndimit në lidhje me agresionin rus në Ukrainë.

Diplomati austriak ka folur edhe për dialogun dhe ka thënë se ai nuk është dialog mes Prishtinës e Beogradit, siç i referohet Beogradi zyrtar, por mes Kosovës e Serbisë.

“Qytetet nuk bisedojnë mes veti, por shtetet”, tha ai.

Mandl tha se Kosova është shtet dhe se Serbia duhet të rreshtohet me botën perëndimore, meqë siç tha ai “serbët e meritojnë këtë”.

“Meqenëse liderët serbë bënë gabim që nuk iu bashkuan mbrojtjes ‘pa gjak’ kundër një sulmi të përgjakshëm lufte – pra sanksioneve (kundër Rusisë v.j.) dhe në këtë aspekt zgjodhën anën e gabuar për një çështje shumë më të gjerë, e gjithë bota ndien se ka një problem në Serbi, i cili vazhdon për shumë kohë më gjatë. Kjo është arsyeja pse shumë tani po e ndjekin me vëmendje sjelljen e shtetit të Serbisë dhe kjo në mënyrë indirekte tërheq vëmendjen ndaj qëndrimit të papranueshëm të Serbisë ndaj Kosovës, i cili po vazhdon për shumë vite”, tha Mandl.

Mandl është anëtar i delegacionit të Parlamentit Evropian për marrëdhënie me Kosovën.

Rusia ka nisur pushtimin e Ukrainës në orët e para të 24 shkurtit. Shtetet perëndimore kanë dënuar veprimet e Rusisë dhe kanë vendosur sanksione ndaj Moskës.

Nga vendet e rajonit, Kosova, Mali i Zi, Shqipëria, Maqedonia e Veriut dhe Kroacia kanë dënuar sulmin rus ndaj Ukrainës.

Kosova, Shqipëria dhe shtetet e rajonit i janë bashkuar Shteteve të Bashkuara dhe Bashkimit Evropian, duke vendosur sanksione ndaj Rusisë.

Ndërkaq, Serbia dhe Bosnja e Hercegovina, kjo e dyta për arsye të bllokimit nga ana e përfaqësueve të Republika Serbskas, janë të vetmet që nuk e kanë dënuar agresionin rus.

Rruga Press