Erdogani dërgon në Kuvend protokollin për anëtarësimin e Suedisë në NATO

Presidenti i Turqisë, Recep Tayyip Erdogan, të hënën ka dorëzuar në Kuvend për ratifikimin protokollin për anëtarësimin e Suedisë në NATO, njofton agjencia “AP”. 

Presidenca e Turqisë ka njoftuar për hapin, ndërsa nuk ka dhënë detaje të mëtutjeshme.

Erdogani kishte vonuar ratifikimin e anëtarësimit të Suedisë në NATO, duke e akuzuar shtetin skandinav se ka qasje tepër të butë ndaj militantëve kurdë dhe grupeve tjera që Turqia i konsideron si rrezik të sigurisë. Turqia po ashtu ishte zemëruar me rastet e djegies së Kuranit në Suedi.

Gjitha 31 shtetet kandidate të NATO-s duhet ta aprovojnë anëtarësimin e Suedisë në aleancë. Turqia dhe Hungaria aktualisht janë aleatët e vetëm që ende nuk e kanë ratifikuar në Kuvend anëtarësimin e Suedisë.

Në një deklaratë të shkurtër të Presidencës së Turqisë, është thënë se Erdogani e ka nënshkruar protokollin për anëtarësimin e Suedisë në NATO, e cila i është dorëzuar tashmë Kuvendit të Turqisë.

Nuk është bërë ende e qartë se kur do të ratifikohet në Kuvend. Por, Suedia e ka mirëpritur vendimin.

“Jam i lumtur të dëgjojë se presidenti i Turqisë, Erdogan, tash ka dorëzuar dokumentet e ratifikimit te Parlamenti i Turqisë. Tash mbetet te Parlamenti të merret me këtë çështje. Po shohim para që të bëhemi anëtarë të NATO-s”, ka shkruar kryeministri i Suedisë, Ulf Kristersson, në platformën “X”.

Suedia dhe Finlanda kishin vendosur të marrin hapin për anëtarësim në NATO, pas pushtimit rus të Ukrainës në shkurt të vitit 2022.

Finlanda iu bashkua NATO-s në prill të këtij viti. Por, anëtarësimi i Suedisë hasi në kundërshtim nga Turqia e Hungaria. 

Sekretari i përgjithshëm i NATO-s, Jens Stoltenberg, i bëri thirrje Turqisë që të ratifikojë së shpejti anëtarësimin e Suedisë në NATO.

“Shumë aleatë do të donin të shihnin përparim të shpejtë në ratifikim. Suedia ka ofruar atë që ka premtuar, tash duhet ratifikuar anëtarësimi i Suedisë”, tha Stoltenberg.

Rruga Press