Eksperti i sigurisë nga Instituti “Octopus”: Serbia kërcënon sërish, BE-ja duhet të reagojë

Eksperti i sigurisë i Institutit “Octopus”, Ridvan Emini, ka reaguar ndaj deklaratave të fundit të Aleksandar Vulin, duke i cilësuar ato si kërcënim serioz për sigurinë e Kosovës dhe stabilitetin rajonal.

Sipas Eminit, thirrjet e Vulinit që Serbia të veprojë sipas modelit të operacioneve të Mossad-it në Iran, duke targetuar politikanë dhe udhëheqës institucionalë, përbëjnë retorikë të rrezikshme që synon frikësimin, mobilizimin dhe nxitjen e tensioneve ndëretnike në Kosovë.

“Deklaratat e ish-shefit të BIA-s dhe kryetarit të Lëvizjes Socialiste, Aleksandër Vulin, janë kërcënim dhe alarm për sigurinë e Kosovës. Thirrjet që Serbia të veprojë sipas modelit të operacioneve të Mossad-it në Iran, duke targetuar politikanë e udhëheqës institucionalë, është retorikë e rrezikshme që synon frikën, mobilizimin dhe nxitjen e dhunës ndëretnike në Kosovë. Kjo është strategjia e destabilizimit, prandaj Instituti “Octopus” ka vlerësuar domosdoshmërinë e reagimit me masa konkrete nga SHBA dhe BE. Gjuha e ish shefit të BIA-s, i cili ka qenë po ashtu shef i ushtrisë e i policisë serbe, nuk guxon të relativizohet si një provokim i zakonshëm. Kur një figurë e tillë në Serbi flet për plane kundër zyrtarëve të Kosovës, jo vetëm që shpërfaq qasjen e mëtejme shoviniste, por është gjithashtu paralajmërim për skenarë dhune”, ka shkruar Emini.

Sipas Eminit, deklaratat e Vulinit përbëjnë dëshmi të një qasjeje destabilizuese nga Beogradi, duke përmendur edhe rastet e Banjskës (2023) dhe incidentin në kanalin e Ibër-Lepencit (2024).

Emini, mes tjerash, vlerëson se në rrethanat kur vëmendja ndërkombëtare është e përqendruar në Lindjen e Mesme dhe Ukrainë, këto zhvillime janë test për reagimin institucional të Kosovës dhe të partnerëve ndërkombëtarë.

“Ky është diskurs i hapur kërcënues që minon stabilitetin dhe sigurinë rajonale. Duke deklaruar se Serbia “e di si bëhen këto gjëra”, e vërteton implikimin e Beogradit në veprimet e kaluara, si në rastin e Banjskës (2023) dhe kanalit të Ibër Lepencit (2024). Thirrjet e tij janë po ashtu sinjal i rrezikshëm që normalizon operacionet subversive e të dhunës politike si instrument shtetërore. Ky diskurs, në kohën kur vëmendja ndërkombëtare është në Lindjen e Mesme dhe Ukrainë, është test për reagimin institucional të Kosovës dhe të faktorit ndërkombëtar”, ka shkruar Emini.

Mes tjerash, Emini theksoi se gjuha e Vulinit ndaj Kosovës reflekton jo vetëm qëndrime nga Serbia, por edhe ndikimin rus, për shkak të lidhjeve të njohura të tij me qarqe pranë Kremlinit.

Rruga Press