Do kthehet në fabrikë armësh/ Policia rrethon godinën e News24, gazetarëve u ndalohet hyrja në redaksi

Që në orët e para të mëngjesit të së shtunës, forca të shumta të Policisë së Shtetit kanë rrethuar godinën e News24.

Me presion të menjëhershëm, pa asnjë paralajmërim dhe pa vendim gjykate, Policia kërkon lirimin e ambienteve të redaksive News24, BalkanWeb, Panorama dhe Gazeta Shqiptare.

Raportohet se gazetarëve u është ndaluar hyrja në redaksi, ndërsa është kërkuar që të dalin nga godina dhe ata punonjës që janë brenda. Gjithashtu, godinës i është ndërprerë edhe energjia elektrike.

Qeveria miratoi më 12 mars 2025 një vendim që i kalon shoqërisë shtetërore KAYO pronësinë e godinave të ish-Uzinës së Autotraktorëve, të cilat ndodhen në zonën e Shkozës. Godina ku sot ndodhet News24 do të kthehet në një fabrikë armësh.

Në krye të kompanisë shtetërore KAYO, Edi Rama ka vendosur ish-drejtorin e Përgjithshëm të Policisë së Shtetit, Ardi Veliun, i cili është duke udhëhequr edhe aksionin e sotëm.

Akti i sotëm është një sulm ndaj medias dhe lirisë së fjalës.