Dita 21! Zjarri në Majën e Rrunës, vijon puna e helikopterit në Lakun e Thive dhe Laku i Mollave. ARRESTOHEN 2 piromanë, 3 nën hetim, mes tyre një grua
Prej 21 ditësh në Shqipëri vijojnë zjarret. Sot vatrat më aktive janë në Majën e Rrunës, Lakun e Thive dhe Laku i Mollave, aty ku po vijon puna për shuarjen e zjarrit me helikopter.
Helikopteri ka nisur punën që në orën 07:00 të mëngjesit duke hedhur ujë në mënyrë që të shuhen vatrat komplet. Ndërsa zjarrfikëset dhe trupat e emergjencave kanë ndërhyrë nga toka ku po bëjnë të mundur vënien nën kontroll flakët.
Policia ka nisur arrestimin, procedimin dhe kërkimin e personave që i kanë vendosur zjarrin qëllimisht sipërfaqeve pyjore.
3 persona do të vihen para përgjegjësisë për ndezjen e disa vatrave zjarri në Lezhë dhe Mirditë. Policia ka arrestuar 66-vjeçarin Preng Luçia, banues në fshatin Gjakëz, Mirditë, i cili ndezi zjarr në oborrin e banesës së tij dhe zjarri ka dalë jashtë kontrollit duke djegur një sipërfaqe të madhe me pyje dhe disa banesa të braktisura në fshatin Gjakëz.
Edhe për një vatër zjarri në Lezhë është arrestuar një 52-vjeçar Petrit Leka, banues në Zejmen, i cili pasi dogji disa mbeturina, por zjarri i ka dalë jashtë kontrollit duke djegur një sipërfaqe të madhe barishte dhe kullota. Zjarrfikësja bëri të mundur shuarjen e flakëve, duke parandaluar përhapjen e zjarrit i cili rrezikonte disa banesa dhe lokale, si dhe automjetet, pasi ishte anës rrugës kryesore në aksin Lezhë-Milot.
Gjithashtu, po hetohet në gjendje të lirë Gjyste Vata, 70 vjeçe, banuese në Balldren, Lezhë. Pasi ka ndezur zjarr në kanalin kullues, zjarri i ka dalë jashtë kontrollit duke djegur një sipërfaqe me bimësi në fshatin Balldre, Lezhë. Materialet në ngarkim të këtyre shtetasve i kaluan Prokurorisë së Rrethit Gjyqësor Lezhë, për veprën penale “Shkatërrimi i pronës me zjarr”.
Edhe në Gjirokastër janë vënë nën hetim dy persona për dy zjarret e shënuara ditën e djeshme në zonë e Dropullit dhe të fshatit Memaliaj. Bëhet fjalë për Vasil Omiro dhe Muharrem Beqiri.
Rruga Press