Covid nuk i tremb, Qeveria dhe bashkia Tiranë, 775 milionë lekë për bileta avioni

Qeveritarët tanë nuk i bllokoi karantina nëpër botë dhe kufizimet e lëvizjeve për shkak të Covid-19. Thesari i Shtetit regjistron shifra rekord pagesash për agjencitë e udhëtimeve që kanë fituar tenderët e biletave për jashtë shtetit. Kampion për udhëtime rreth botës mbetet Bashkia e Tiranës. Nisur nga aktivitetet e kryera së fundmi me skype nga Erion Veliaj me Diasporën, duket se ai dhe stafi i tij lëviz jashtë për të lobuar për një çmim të ri ndërkombëtar për Bashkinë e Tiranës.

Vetëm për tre muaj, shtator- nëntor, Thesari i Shtetit ka paguar zyrtarët për udhëtime jashtë vendit në vlerën 77 milion e 565 mijë lekë (Burimi: Open Procurement Albania).

Ku kanë shkuar zyrtarët tanë? Sigurisht, që shumica e këtyre udhëtimeve nuk kanë lidhje me punët e shtetit, sepse qysh nga fillimi vitit, samitet, seminaret, çdo takim ndërkombëtar apo bilateral zhvillohet online.

Udhëtimet jashtë shtetit vijnë në një trend rritës gjatë kësaj periudhe tremujore që analizohet, sepse mesatarja mujore e bashkisë Tiranë, në vitin 2019, ka qenë afro 19 mijë euro. Në këtë tremujor shifra është mbi 60 mijë euro.

Ndërkaq vazhdojnë abuzimet me tenderët e blerjes së këtyre biletave. Tenderi i datës 9 tetor 2020, me objekt blerje 3 bileta avioni, për udhëtim vajtje-ardhje në linjën Tiranë-Paris-Tiranë sjell si rezultat blerjen e tyre me tre çmime të ndryshme, megjithëse janë me një avion dhe me njëjtin klas. Blerja është bërë në tre agjenci të ndryshme, ku çmimi më i lartë ka marrë 250 Euro më tepër se dy të tjerët, ose 1.5 milionë lekë krahasuar me më të ultin 1.15 milionë lekë.

Për të fshehur gjurmët e këtyre shpenzimeve luksi, Bashkia Tiranë ka hequr dorë nga praktika e dikurshme me marrëveshje kuadër për blerje biletash. Tani bëhen të veçuara tenderët. Njoftimi i tenderit të përvitshëm në 2016 fillonte me fjalët: “Blerje bilete udhëtimi për transport ajror ndërkombëtar. Për vitin…. destinacionet e mundshme, ku personeli i Bashkise Tiranë do te ketë aktivitete, shtete të ndryshme në të gjitha kontinentet. Autoriteti Kontraktuar nuk mund të përcaktojë ekzaktësisht numrin e udhëtimeve si dhe destinacionin e tyre në këtë fazë të prokurimit. Koha, numri i udhëtimit ose udhëtimeve në destinacionet përkatëse do të vendoset sipas rastit në varësi të kërkesës – Financuar nga Buxheti i Bashkisë Tiranë. Blerje bileta udhetimi vajtje ardhje me avion në Medellin, Kolumbi….”.

Për muajin dhjetor që zyrtarët lëvizin më shumë për Krishtlindjet, parashikohen më shumë shpenzime për bileta në destinacionet turistike nga zyrtarët shqiptarë.