Bosnja zhvarros eshtrat e dyshuara të një familjeje viktimë e kohës së luftës
Mbetjet mortore të katër personave, që dyshohet se janë një familje e zhdukur gjatë luftës së Bosnjës në vitin 1992, u gjetën pranë fshatit Pribosijevici në komunën e Rogaticës.
Instituti Boshnjak për Personat e Zhdukur tha të premten se në një zhvarrim pranë fshatit Pribosijevici në komunën Rogatica në lindje të vendit janë zbuluar eshtrat e katër personave.
“Katër viktima, duke përfshirë një fëmijë, po kërkohen në zonë dhe supozohet se mbetjet mortore të gjetura sot mund t’u përkasin atyre”, tha për BIRN zëdhënësja e Institutit të Personave të Zhdukur, Emza Fazliç.
Disa nga mbetjet mortore ishin djegur, tha Fazliç.
Eshtrat do të transferohen në Qendrën Përkujtimore në Tuzla, ku do të bëhet analiza e ADN-së për të përcaktuar identitetin e tyre.
Sipas Institutit për Personat e Zhdukur, rreth 7,600 persona të zhdukur gjatë luftës së viteve 1992-1995 nuk janë gjetur ende.
Rreth 25,500 persona të zhdukur janë gjetur dhe identifikuar deri më tani – rreth 80 për qind e atyre që u zhdukën./balkaninsight/