Bosnja arreston shtatë ish-policë serbë për vrasje lufte
Shtatë ish-oficerë policie serbe të Bosnjës u arrestuan nën dyshimin për përfshirje në vrasjen e 22 civilëve boshnjakë, përfshirë gra dhe fëmijë, në një fshat afër Bijeljinës në vitin 1992.
Oficerët e policisë së Agjencisë Shtetërore për Investigim dhe Mbrojtje arrestuan shtatë persona të premten me dyshimin për përfshirje në vrasjen e 22 boshnjakëve, duke përfshirë shtatë fëmijë dhe tetë gra, në fshatin Balatun, afër Bijeljinës gjatë luftës në shtator 1992.
“Individët e akuzuar për pjesëmarrje të drejtpërdrejtë në ekzekutimin e viktimave janë në mesin e të dyshuarve që janë arrestuar”, tha prokuroria shtetërore e Bosnjës në një deklaratë.
Prokuroria tha se të dyshuarit janë arrestuar në disa qytete të Bosnjës dhe Hercegovinës dhe do t’i dorëzohen prokurorit për t’u marrë në pyetje.
Një nga të arrestuarit ishte Goran Sariç, ish-komandant i një brigade speciale të policisë serbe të Bosnjës, i cili më parë është liruar nga akuzat në dy raste të veçanta në gjykatën shtetërore të Bosnjës për përfshirje në gjenocidin e Srebrenicës në 1995 dhe për pjesëmarrje në krime lufte në Sarajevë në 1992.
Burrat e tjerë që u arrestuan janë Zivan Miljanoviç, zëvendëskomandant i Stacionit të Sigurisë Publike në Bijeljina, Stevo Bokariç, një operativ i Shërbimit të Sigurimit të Shtetit në Bijeljina, Jovica Petroviç dhe Mirko Simiç nga Stacioni i Sigurisë Publike në Bijeljina, dhe Ljubo Markoviç dhe Slavenko Koceviç, anëtarë të një njësie speciale të policisë serbe të Bosnjës të njohur si Pahuljice (Flokët e borës).
Njëzet e dy anëtarë të familjeve Sarajliç, Sejmenoviç dhe Malagiç, duke përfshirë shtatë fëmijë, u morën nga shtëpitë e tyre në Bukres afër Bijeljinës dhe u vranë në brigjet e lumit Drina në fshatin Balatun në agimin e 25 shtatorit 1992.
Eshtrat e 13 prej viktimave u gjetën në një varrezë në qytetin serb të Sremska Mitrovicës në vitin 2002. Pesë trupa të viktimave të tjera u gjetën dhe u varrosën më vonë, ndërsa katër viktima janë ende të zhdukur./balkaninsight/
RrugaPress