Bjellorusia mban manovra me armë bërthamore
Bjellorusia, ku janë vendosur edhe armë bërthamore ruse, ka njoftuar të hënën (18.05.2026) se forcat e saj të armatosura kanë nisur trajnimin sesi t’i vendosnin ato në terren, raporton Reuters.
“Gjatë trajnimit, në bashkëpunim me palën ruse, është planifikuar të praktikohet shpërndarja e municioneve bërthamore dhe përgatitja e tyre për përdorim”, thuhet në deklaratën e Ministrisë së Mbrojtjes së Bjellorusisë.
Minsku njofton se stërvitja do të testojë gatishmërinë e ushtrisë për vendosjen e armëve bërthamore në zona të ndryshme të vendit.
“Theksi do të jetë në praktikimin e fshehtësisë, lëvizjes në distanca të konsiderueshme dhe llogaritjeve për përdorimin e forcave dhe pajisjeve”, thuhet në deklaratë.
Bjellorusia ndan kufij me Rusinë, Ukrainën dhe tri shtete të NATO-s.
Presidenti Alexander Lukashenko u pajtua më 2023 – një vit pas pushtimit të Ukrainës nga Rusia – të vendosë raketa bërthamore taktike ruse. Presidenti rus, Vladimir Putin, e ka bërë të qartë se Moska mban kontrollin mbi përdorimin e tyre.
Gjatë gjithë konfliktit, Putin ka paralajmëruar për fuqinë bërthamore të Rusisë që Perëndimi i ka parë si paralajmërime për të mos u lëshuar në mbështetje të madhe për Ukrainën.
Putin ka thënë javën e kaluar se Rusia do të vendosë raketën e saj të re bërthamore Sarmat deri në fund të vitit dhe se Moska do të vazhdojë t’i modernizojë forcat e saj bërthamore.
Bjellorusia ka bërë të ditur se stërvitja aktuale nuk ka për qëllim asnjë shtet tjetër dhe se nuk paraqet kërcënim për sigurinë në rajon.