BB, kritika Shqipërisë:70% e mbetjeve nuk menaxhohen si duhet, 147 mld dollarë dëm në vit nga tërmetet e përmbytjet

Megjithëse buxheti i shtetit po jep miliona euro vitet e fundit për industrinë e incineratorëve një raport i fundit i Bankës Botërore kritikon Shqipërinë për faktin se 70 përqind e mbetjeve nuk trajtohen në mënyrën e duhur. BB evidenton se dëmet në mjedis po shkaktojnë rreth 147 milionë euro dëm çdo vit nga përmbytjet dhe tërmetet.

Edhe pse janë paguar miliona euro për incineratorët, 70% e mbetjeve në Shqipëri nuk menaxhohen si duhet.

Ky është qëndrimi i Bankës Botërore për Shqipërinë, në raportin e fundit të Memorandumit Ekonomik për Shtetet.

Sipas këtij raporti, Shqipërisë i duhet të krijojë një model ekonomik të ndërgjegjshëm për mbrojtjen e mjedisit dhe më të fortë ndaj fatkeqësive natyrore pasi sipas saj tërmetet dhe përmbytjet shkaktojnë rreth 147 milionë dollarë dëme çdo vit.

Banka Botërore sugjeron së Shqipëria duhet të investojë më së shumti në aftësitë e fuqisë punëtore, rritjen e produktivitetit të firmave dhe forcimin e financave publike.

Në raport bëhet me dije se Shqipërisë do t’i duhet të reformojë sistemin universitar dhe të zhvillojë aftësitë që përshtaten më mirë me nevojat e tregut të punës.

Ndërsa për të rritur produktivitetin e firmave shqiptare, Shqipërisë i kërkohet të përmirësojë mjedisin e biznesit dhe të forcojë inovacionin si kushte për përfshirjen e shqiptarëve në ekonominë globale.

Një tjetër shqetësim i Bankës Botërore lidhet me borxhin publik.

Referuar raportit, ky tregues është shumë më i lartë se mesatarja e borxhit në 6 vendet e Ballkanit Perëndimor.

Për të garantuar qëndrueshmërinë e financave të vendit, sipas këtij institucioni është e nevojshme që normat e tatimit mbi të ardhurat personale të jenë më të drejta, të rriten të ardhurat nga TVSH-ja dhe të riforcohet besueshmëria e politikës fiskale./ora/

Rruga Press