Basha takon fermerët e Kukësit: Qeveria i ka braktisur, po groposin prodhimet

Në vijim të vizitës në Kukës, kreu i i Partisë Demokratike, zhvilloi takime me banorët e Novosejës dhe Shishtavecit, dy zonat e njohura për kultivimin e patates, ku u njoh nga afër me shqetësimet e fermerëve të këtyre fshatrave, si largimi i të rinjve dhe mungesa e tregut të shitjes.

“Pjesa më e madhe e të rinjve ka emigruar. Këtu pothuajse kanë ngelur më shumë pleq edhe plaka. Nuk e di, domethënë ne kemi qenë të varfër gjithmonë këtu po kemi qenë me shpresë, tani vazhdojmë të jemi të varfër por fatkeqësisht nuk kemi as shpresë”, – thotë një prej banorëve në fshatin Novosej. 

“Vjet kisha unë 150 kuintal të mëdhaja, kualitet i parë për treg dhe arritëm mos të shes asnjë, të gjitha u kalbën në gropë. Mu kalbën të gjitha. 150 kuintal po ishte njëfarë gjobe e madhe për ne, se ishte buka e fëmijëve, e gjitha buka e familjes kishte punuar për atë”, – thotë një tjetër fermer.

 “Nafta është shtrenjtë që është kryesore. Kur ta marr unë shtrenjtë unë naftën fermeri nuk mundet ta përballoj. Kërkojmë subvencion sidomos për pataten për far atë reja edhe mundësisht me mekanik bujqësore. Ka ik koha e parmendës”, – u shpreh një tjetër banor.

Kreu demokrat akuzoi qeverinë se e ka braktisur këtë zonë për mënyrën sesi e ka trajtuar.

 “Është mëkat që një zonë me kaq shumë traditë ku prodhimet tuaja kanë bërë emër në Shqipëri dhe në të gjithë rajonin ta gjej në një varfëri të tillë. Është mëkat i dyfishtë që në një kohë kur njerëzit po vuajnë për ushqimet bazë ne nuk arrijmë të garantojmë shitjen e patates tuaj dhe nuk arrijmë të lajmë as shpenzimet që ju keni hedhur për ta rritur këtë patate. Shqipëria po mbytet me prodhime të subvencionuara të fermerëve të huaj. Pse? Sepse ne nuk jemi në krahun tuaj, sepse qeveria nuk është në krahun tuaj”.  

Basha premtoi se kur të vijë në pushtet do ta mbështesë fermerët me subvencionime, si mënyra e vetme për të shpëtuar bujqësinë.

“Nesër ju garantoj që do të jem në krahun tuaj, jo me fjalë por me subvencione, me mbështetje direkte për fermerët. Kjo është rruga e vetme për të shpëtuar bujqësinë, për të ndalur emigracionin, se dhe t’ju iki gjithë rinia në emigracion, ndërkohë që ka pasuri të jashtëzakonshme vendi, ka mundësi të jashtëzakonshme”.