Bandat kriminale në Kolumbi vranë të paktën 145 aktivistë vitin e kaluar

Kolumbia raportoi vdekjen e të paktën 145 aktivistëve dhe mbrojtësve të të drejtave të njeriut, vitin e kaluar, pasi luftimet nga bandat e armatosura nxitën dhunën e mëtejshme.

Carlos Camargo, Avokati i Popullit, ka thënë se viktimat përfshinin liderë indigjenë, sindikalistë dhe përfaqësues të komuniteteve rurale.

Shumica e vrasjeve ishin të lidhura me grupe të paligjshëm të armatosur, tha ai, pa përmendur autorët e supozuar.

Vendi është një nga më të rrezikshmit në botë për aktivistët, thonë vëzhguesit.

Kolumbia është zyrtarisht në paqe, pasi nënshkroi një marrëveshje me grupin më të madh rebel, Forcat e Armatosura Revolucionare të Kolumbisë (FARC), në vitin 2016. Por bandat e tjera të armatosura vazhdojnë të veprojnë në këtë vend, që njihet edhe si prodhuesi më i madh i kokainës në botë.

Dhuna është rritur muajt e fundit për shkak të mosmarrëveshjeve mbi territorin dhe burimet që përfshijnë rebelët disidentë të Farc-ut dhe anëtarët e një grupi tjetër gueril marksist – ELN – si dhe grupet paraushtarake të krahut të djathtë dhe bandat kriminale si Klani i Gjirit.

Shumica e vrasjeve ndodhën në zonat ku veprojnë trafikantët e drogës, sipas zyrës së Avokatit të Popullit.

Vitin e kaluar u panë gjithashtu protesta antiqeveritare që u shtypën dhunshëm nga forcat kolumbiane të sigurisë, të cilat u akuzuan nga grupet e të drejtave të njeriut dhe protestuesit për përdorimin e forcës së panevojshme. Më shumë se 50 njerëz vdiqën, tha Avokati i Popullit.

Numri i aktivistëve të vrarë vitin e kaluar ishte më i ulët se në vitin 2020, kur zyra e Avokatit të Popullit regjistroi 182 vrasje.

Rruga Press