Anëtari i ‘Vetingut’, Ardian Hajdari akuzohet për fshehje pasurie
SPAK i ka komunikuar akuzën e fshehjes së pasurisë, anëtarit të Kolegjit të Posaçëm të Apelimit, Ardian Hajdari.
Pritet që pas komunikimit zyrtarisht të akuzës, KPA të bëjë pezullimin nga detyra të Ardian Hajdarit.
Anëtari i shkallës së dytë të vetingut, akuzohet nga SPAK për fshehje të të ardhurave tatimore dhe mos deklarim pasurie në ILKDPI gjatë ushtrimit të detyrës së avokatit.
Ardian Hajdari është anëtari i dytë pas Luan Dacit që vihet nën akuzë nga SPAK, i cili u shkarkua nga detyra pas dënimit me formë të prerë për ‘falsifikim dokumentesh’.
Ky zhvillim e kompromenton procesin e vetingut pas, vendimet e KPA merren nga një trupë prej tre gjyqtarësh dhe shpesh, këto vendime nuk kanë qenë me votë unanime.
Kallëzimi
Anëtari i KPA, Hajdari u kallëzua në SPAK në qershor 2020 nga ish-gjyqtarë dhe ish-prokurorë që nuk kaluan procesin e vetingun.
Ish-prokuroria Antoneta Sevdari, ish-gjyqtari Ervin Metalla dhe ish-prokurori Elsion Sadiku e kallëzuan për falsifikim dokumentesh përveç fshehjes dhe mos deklarim të pasurisë.
Në janar 2020, ishte anëtari i Këshillit të Lartë të Prokurorisë, Besnik Cani që kallëzoi pranë SPAK, dy gjyqtarët e Kolegjit të Posaçëm të Apelimit, Ardian Hajdari dhe Luan Daci.
Sipas tij, Hajdari dhe Daci nuk përmbushin kushtet ligjore, përkatësisht; gjyqtari Hajdari nuk ka notën mesatare 8 të kërkuar nga ligji, ndërsa gjyqtari Daci ka fshehur shkarkimin e tij në vitin 1997.
Ish-prokuroria Sevdari paraqiti dhe një ankesë pranë Operacionit Ndërkombëtar i Monitorimit (ONM) për Hajdarin por që nuk u mor parasysh.
Sipas saj, Hajdari nuk plotëson tre kushtet kryesore që përcakton Kushtetuta për të qenë pjesë e KPA.
Servdari thotë se Ardian Hajdari nuk ka një eksperiencë prej 15 vite në sistemin e drejtësisë pasi ishte i regjistruar si avokat në Këshillin Rajonal të Avokatëve të Shkodrës për vetëm 13 vite.
Gjithashtu, ajo pretendon se Hajdari nuk ka asnjë dëshmi për ndonjë biznes të regjistruar, gjë që do të thotë se ka fshehur të ardhurat nga organet tatimore.
Sevdari më tej thekson se Hajdari nuk kishte notën mesatare jo më pak se 8, pasi në diplomën për drejtësi ka mesatare 6.44 ndërsa master nuk ka kryer asnjëherë.
Deklarimi i Ardian Hajdari
Në CV zyrtare të publikuar në faqen e KPA, thuhet se Hajdari në vitin 1996 ka përfunduar studimet universitare në Fakultetin e Drejtësisë, pranë Universitetit “Luigj Gurakuqi”, Shkodër.
Nga viti 1995 deri në vitin 1998, ka punuar si ndihmësgjyqtar pranë ish-Gjykatës së Shkallës së Parë Malësi e Madhe dhe 1998-2000, ka punuar ndihmësgjyqtar pranë Gjykatës së Rrethit Gjyqësor Shkodër.
Si avokat ka ushtruar profesionin 2000-2017, ku në periudha të shkurtra ka punuar si jurist pranë Hidrocentralit Koman, dhe jurist pranë Bashkisë Vau Dejës.
Në deklarimin e pasurisë në vitin 2017, Ardian Hajdari deklaron pagë prej 3 854 376 Lekë si gjyqtar i KPA dhe depozita me vlerë 400 000 Lekë, 8 000 Euro dhe 4 000 Dollarë. Ai thotë se është pronar i 1/8 të një apartamenti në Shkodër me sipërfaqe 75 m2 si dhe ka në pronësi një makinë të tipit ‘Mercedes Benz’ me vit prodhimi 1996 me vlerë 3 000 Euro me të ardhura dhe kursimet nga punësimi si avokat.
Rruga Press