Alban Hyseni reagon pas ndalimit dyorësh nga autoritetet serbe

Kryetari i Gjilanit, Alban Hyseni, ka reaguar pasi ai dhe deputeti i Lëvizjes Vetëvendosje, Luan Aliu, janë ndaluar në pikën kufitare “Dheu i Bardhë” me Serbinë derisa ishin duke udhëtuar për në Bujanoc.

Hyseni ka shpjeguar se ka qenë duke shkuar në Bujanoc për ngushëllime për vdekjen e vëllait të kryetarit të Komunës së Bujanocit.

“Rrugës për Bujanoc, në ngushëllime për humbjen e vëllaut tek kolegu im, Kryetari i komunës së Bujanocit Nagip Arifi, bashkë me deputetin e Kuvendit të Republikës së Kosovës, Luan Aliu dhe Kryesuesin e Kuvendit Komunal të Gjilanit, Arianit Sadiku, u ndaluam nga autoritetet serbe në pikën kufitare të Dheut të Bardhë” – ka shkruar Hyseni.

Sipas tij, pas më shumë se 2 orë pritjeje, atyre u është lejuar të vazhdojnë udhëtimin e tyre, pa u dhënë asnjë arsye se pse janë ndalur në këtë pikë kufitare.

“Ata të diskriminojnë e të ndalin në kufinjë pa arsye, duke përdorur figura politike e qytetarë për tensionimin edhe më tej të situatës së brishtë që gjendemi tani” – ka shkruar tutje Hyseni.

Rruga Press