Akuzat e rënda të Prokurorisë për Telebingon Shqiptare dhe mikun e kryebashkiakut Erion Veliaj

Alban Dabulla, i njohur edhe si pronari i Telebingos, veç akuzës për evazion fiskal, po hetohet edhe për pastrim të parave. Madje burime nga prokuroria bëjnë të ditur se edhe aktiviteti i Telebingos prej tetë muajsh është ushtruar pa licencë.

Katër akuza zyrtare janë ngritur nga prokuroria e Tiranës ndaj biznesmenit, Alban Dabulla, i cili prej disa ditësh është larguar nga Shqipëria, duke iu shmangur një hetimi financiar që bën fjalë për mospagimin e mbi 3 milion euro në arkën e Tatim-Taksave.

Mësohet se ndaj pronarit të kompanisë “Telebingo”, rëndon akuza e “Mospagimin e Taksave dhe Tatimeve”, “Fshehje të ardhurash” dhe “Organizimi i llotarive të palejuara dhe pa liçensë”.

Kjo pasi, nga hetimet e kryera ka rezultuar se Alban Dabulla ka vijuar aktivitetin e llotarisë “Telebingo” për një afat 8 mujor duke mos pasur asnjë miratim licence nga organet përkatëse.

Sipas kësaj akuze, subjekti ka krijuar të ardhura në një kohë kur licenca e tij kishte përfunduar.

Por ajo që është më e rënda, i njohuri edhe si mik i kryebashkiakut Erjon Veliaj, akuzohet edhe për “Pastrim të produkteve të veprës penale”.

Mes personave të akuzuar nga prokuroria e kryeqytetit është dhe administratorja në hije e kompanisë, N. S.

Ndërsa zyrtarë të tjerë që janë vënë nën hetim në total janë 20 persona.

Personat janë zyrtarë të shtetit apo ekspertë kontabël.

Pak ditë më parë prokuroria e Tiranës, iu drejtua me një kërkesë për caktimin e masës së sigurisë “arrest në burg” ndaj 20 personave të përfshirë në këtë skemë kriminale për shmangien e detyrimeve tatimore.

Por gjyqtarja, Oltjona Goxha, në dhënien e vendimit refuzoi të pranojë kërkesën e prokurorisë, duke i thënë “JO” arrestimit të biznesmenit, Alban Dabulla dhe 19 personave të tjerë.

Ndërsa prej disa ditësh, Prokuroria por edhe Tatimet, kanë vendosur sekuestron preventive për kompaninë “Telebingo”.

Shkak është bërë nisja e hetimeve me dyshimet për evazion fiskal.

Përmes këtij veprimi, organi i akuzës nuk lejon tjetërsimin e aksioneve, por dhe nuk lejon ndërhyrjen për përpunimin e të dhënave në server.

Megjithatë procesi hetimor, lejon funksionimin normal të subjektit.

Kjo masë shtrënguese për kompaninë “Telebingo”, që është vendosur tashmë nga prokuroria e Tiranës, është e dyta e këtij lloji.

Pasi për të njëjtën kompani ku pronar është Alban Dabulla, në datën 25 tetor 2021, është vendosur një masë e dytë siguruese nga Drejtoria e Mbledhjes së Detyrimeve Tatimore të Papaguara e Rajonit Qendror.

Rruga Press