Aksion i madh i forcave speciale amerikane në veriperëndim të Sirisë

Forcat speciale amerikane kanë kryer një aksion anti-terrorizëm në veriperëndim të Sirisë, në afërsi të kufirit me Turqinë, ka njoftuar Pentagoni.

Zëdhënësi ka thënë se misioni ka qenë i suksesshëm dhe nuk ka pasur viktima në mesin e amerikanëve, por nuk ka dhënë detaje tjera, raporton agjencia AP.

Organizata “Helmetat e Bardha” ka raportuar se së paku 13 persona, përfshirë gjashtë fëmijë e katër gra, kanë humbur jetën në qytetin Atmeh.

Zona besohet se është shtëpi e xhihadistëve të huaj të lidhur me al-Qaedan.

Banorët në Atmeh kanë dëgjuar uljen e disa helikopterëve rreth mesnatës të enjten, dhe dëgjuan të shtëna me armë dhe po ashtu bombardime për dy orë.

Fotografitë e postuara në rrjetet sociale më pas kanë shfaqur ndërtesat e shkatërruara.

Syrian Observatory for Human Rights, një grup monitorues me seli në Britani, ka thënë se operacioni i SHBA-së ishte më i madhi në veriperëndim të Sirisë që kur lideri i ISIS-it, Abu Bakr al-Baghdadi vdiq në një aksion të forcave speciale në tetor të vitit 2019.

Rruga Press