Agjenda e Scholzit nesër në Kosovë; do të takohet vetëm me kryeministrin Kurti

Gjatë vizitës së tij në Kosovë kancelari i Gjermanisë Olaf Scholz do të ketë vetëm një takim, atë me kryeministrin Albin Kurti.

Përveç këtij takimi, ai do të vizitojë trupat gjermanë që shërbejnë në kuadër të KFOR-it.

Kështu ka deklaruar për RTKlive në një përgjigje me shkrim Zyra për Media e Qeverisë së Gjermanisë.

Kjo zyrë konfirmon se kancelari gjerman do të mbërrijë në Prishtinë nesër, 10 qershor, në orën 9:45 minuta.

Ai do të pritet në takim nga kryeministri Albin Kurti, kurse më pas, në orën 11:30, është përcaktuar të mbahet dhe një konferencë e përbashkët për media.

Me kaq takimet e kancelarit gjerman në Kosovë do të mbarojnë.

“Mbërritja në Serbi është parashikuar në orën 15:00. Atje kancelari do të pritet nga presidenti serb Vuçiq, ku do të ketë diskutime me të dhe kryeministren Bërnabiq”, thotë një zëdhënës për media në Qeverinë e Gjermanisë.

Bazuar në këtë agjendë, është parashikuar që në orën 16:50 të ketë një konferencë të përbashkët për media të kancelarit Scholz dhe Vuçiqit.

Kancelari Olaf Scholz, pas Kosovës dhe Serbisë, do të vizitojë edhe Greqinë, Maqedoninë e Veriut dhe Bullgarinë, ku edhe i jep fundit kësaj vizite në vendet e Ballkanit Perëndimor.

Të gjitha këto vizita dhe takime do të realizohen më 10 dhe 11 qershor.

Rruga Press