A po përgatitet luftë? Rusia filloi tërheqjen e diplomatëve nga Ukraina

Me tensionet në rritje në kufirin mes Rusisë dhe Ukrainës, Moska ka filluar të tërheqë diplomatët e saj dhe familjet e tyre nga ambasada në Kiev dhe konsullata në Lviv, ka shkruar New York Times, duke cituar zyrtarë anonimë.

Gazeta shkruan se 18 vetë, kryesisht fëmijë dhe gra të diplomatëve rusë, u larguan nga Ukraina më 5 janar.

30 persona të tjerë raportohet se u larguan gjatë dy javëve në vijim, derisa diplomatëve në dy konsullatat tjera ruse në Ukrainë (Kharkov dhe Odessa) u është thënë të përgatiten për largim nga vendi.

Në përgjigje për këtë, Ministria e Jashtme e Rusisë tha se ambasada e saj në Kiev po funksionon normalisht, por nuk mohoi zvogëlimin e stafit.

Sipas New York Times, zyrtarë nga Shtetet e Bashkuara dhe Ukraina kanë konfirmuar se diplomatët rusë janë larguar nga vendi.

Raportet për evakuime vijnë pasi vendet perëndimore akuzojnë Moskën për grumbullimin e trupave në kufirin me Ukrainën, me synimin për të pushtuar vendin në javët apo muajt e ardhshëm.

Kremlini zyrtar ka mohuar në mënyrë të përsëritur çdo plan për të sulmuar Ukrainën.

Rruga Press