KLSH për doganat shqiptare: Nuk kanë mekanizma kontrolli për funksionet e sistemit
Në një auditim të kryer nga Kontrolli i Lartë i Shtetit rezulton se të dhënat e sistemit doganor nuk administrohen nga Drejtoria e Doganave siç dhe parashikon ligji, por nga AKSHI. Zhvillimi i veprimtarisë së këtij institucioni pa akte rregullatore sjell mospërcaktimin e përgjegjësive indicivuale për veprimet e kryera në sistemin doganor.
Drejtoria e Përgjithshme e Doganave nuk disponon të dhënat bazë që gjenerohen prej sistemit doganor të njohur si “Asycuda”.
Është ky përfundimi i dalë nga auditimi i Kontrollit të Lartë të Shtetit në Drejtorinë e Doganave për periudhën 1 janar 2019 deri në 31 dhjetor të vitit të kaluar.
Sipas raportit, aktualisht detyra e administrimit të të dhënave të këtij institucioni i është deleguar verbalisht në mungesë të plotë dokumentacioni specialistëve të Agjencisë Kombëtare të Shoqërisë së Informacionit.
Por kalimi i strukturës së teknologjisë së informacionit në varësi të AKSHI-it, i ka vendosur Doganat në kushtet e një rreziku të lartë sigurie për humbjen apo tjetërsimin e të dhënave shtetërore.
Kjo sepse mes këtyre institucioneve nuk ka asnjë marrëveshje që përcakton rolet dhe përgjegjësitë e tyre.
Vetë Drejtoria e Doganave nuk ka asnjë punonjës në strukturën e saj për ruajtjen dhe administrimin e të dhënave pavarësisht se e ka detyrim ligjor.
Një tjetër problematikë e konstatuar lidhet me fshirjen e gjurmës elektronike të auditimit për vitin 2019 me argumentin se madhësia e kësaj tabele bllokoi punën me sistemin e të dhënave “Asycuda World” për disa orë.
Sipas audituesve, për këtë veprim nuk ka asnjë shpjegim të dokumentuar nga kreu i Drejtorisë së Doganave.
Kjo situatë sipas KLSH, rrezikon të përsëritet në të ardhmen sepse nuk janë ngritur mekanizma kontrolli që lidhen me funksionet e sistemit.
Mungesa e të gjitha këtyre akteve rregullatore sjell mospërcaktimin e përgjegjësive për veprimet e kryera në sistem.
Gjithashtu nga auditimi është konstatuar se Doganat nuk kanë një plan vazhdimësie dhe plan rikuperimi për vijimin e shërbimit në rastet e fatkeqësive natyrore si ajo e tërmetit të 26 nëntorit të vitit 2019./ora/