Franca tregon muskujt, vendos anije luftarake në Mesdheun lindor

Franca shfaqi forcën e saj ushtarake të hënën me një turne në fregatën e saj të re Auvergne në Mesdheun lindor, duke kërkuar të nënvizojë atë që kapiteni i anijes tha se ishte më e rëndësishme, që Parisi i kushton vëmendje garantimit të sigurisë dhe stabilitetit në rajon.

Kapiteni Paul Merveilleux de Vignaux tha se Auvergne me ekuipazhin e saj prej 150 trupash do të vendoset në Mesdheun lindor deri në janar për të mbledhur informacione në mënyrë që të “tregojë se si respektimi i ligjit ndërkombëtar dhe veçanërisht liria e lundrimit ka rëndësi” për Francën.

“Kjo vendosje nënvizon se sa të rëndësishme e konsideron Franca këtë pjesë të detit Mesdhe”, si dhe “gatishmërinë e vendit për të kontribuar në stabilizimin e kësaj zone strategjike,” u tha De Vignaux gazetarëve në portin qipriot të Larnaka.

Auvergne është vënë në punë tre vjet më parë. Ajo ka pajisje të avancuara sonarë dhe është e specializuar në luftën kundër nëndetëseve.

De Vignaux tha se kjo është hera e 12-të që Auvergne viziton Qipron, të cilin ai e quajti si çelës për mbështetjen e operacioneve detare franceze në rajon.

“Nuk mund të ketë operacione detare efikase dhe të qëndrueshme pa mbështetje dhe Qiproja është pjesa qendrore e saj,” tha De Vignaux.

Udhëtime të përsëritura në Qipro ka bërë edhe aeroplanmbajtësja franceze Charles de Gaulle.

Marrëdhëniet midis Qipros dhe Francës janë afruar në vitet e fundit. Qiproja gjithashtu lejon avionët francezë të përdorin bazën e saj ajrore ushtarake në cepin juglindor të ishullit dhe lejon anijet franceze të përdorin portin e saj detar jugor, i cili tani po i nënshtrohet një përmirësimi.

Franca është gjithashtu e prirur të shfaqë praninë e saj për t’i dërguar sinjale Turqisë që të mos ndërhyjë në shpimet në det të hapur nga kompania franceze e energjisë Total dhe partneri i saj italian Eni vitin e ardhshëm në ujërat jashtë bregdetit jugor të Qipros.

Turqia nuk e njeh Qipron si një komb dhe konteston ujërat ku qeveria qipriote pretendon të drejta ekskluzive ekonomike. Ankaraja thotë se një pjesë e madhe e atyre ujërave ose mbivendosen në shelfin e saj kontinental ose i përkasin turqve qipriotë të shkëputur.

Qiproja u nda në vitin 1974 kur Turqia pushtoi pas një grusht shteti nga mbështetësit e bashkimit me Greqinë. Vetëm Turqia njeh një shpallje të pavarësisë turke qipriote të vitit 1983 në pjesën e tretë veriore të ishullit, ku mban më shumë se 35,000 trupa.

Në shkurt 2018, luftanijet turke penguan një anije stërvitjeje të marrë me qira nga Eni të kryente shpime eksploruese në ujërat në juglindje të Qipros.

Analistja politike Anna Koukkides-Procopiou thotë se prania detare franceze është një sinjal i qartë për Turqinë.

“(Presidenti francez Emmanuel) Macron duhet ta projektojë këtë fuqi në rajon, sepse kjo është pjesë e gjithë politikës së tij për të krijuar apo rithemeluar Francën si një fuqi të madhe, e cila nuk është vetëm dominuese në rajonin e Lindjes së Mesme, por (në) Afrikë”, tha Koukkides-Procopiou për Associated Press, përcjell Rruga Press.

“Dikush duhej të hynte dhe ta mbushte atë vakum (në Mesdheun lindor). Tani Franca dëshiron të sigurohet që nuk është Turqia”, tha ajo.

Rruga Press