Humoristi i Ersekës, 10 mln lekë nga taksat e banorëve për dreka/darkat e kolegëve

Nga Boldnews.al

Erion Isai është katapultuar nga skena në krye të Bashkisë së Ersekës. Megjithëse i larguar prej vitesh, humoristi ia doli të bindte Edi Ramën, që ta kandidonte. Herën e fundit nuk pati zgjedhje, veçse votime.

Por, kjo s’e ka penguar që të ketë dorë të lirë në arkën e varfër të kësaj bashkie, e cila ka sy dhe veshë nga pushteti qendror. Disa projekte janë bërë nga FSHZH, madje edhe nga ARRSH.

Po lekët e taksave, ku shkojnë?

Natyrisht, humoristi ia ka gjetur vendin edhe qindarkave të fundit, ku në vend që të rregullojë apo rikonstruktojë ndonjë çerdhe, kopësht apo shkollë, këto lekë po i harxhon me dreka/darka të kolegëve të tij artistë.

Kolegët e tij, nuk duhet të jenë keq për një vakt ushqimor, përderisa e marrin mundimin të shkojnë në Ersekë, por sërish Isai nuk nuk i lë duarbosh.

Sipas dokumenteve që disponon Boldwews.al, Bashkia Kolonjë ka hapur një tender me objekt “shërbim akomodim, ushqim për pjesëmarrësit në aktivitete turistike, kulturore, turistike, viti 2021”.

Një fushë që i përket edhe kryetarit të kësaj bashkie, i cili më së shumti njihet si humorist sesa si drejtues. Por, nëse do të ftojë kolegët në Ersekë, përse duhet t’i kenë të paguara nga banorët?

Nëse do t’i pyesësh me radhë kolegët e humoristit, gjithkush e ka mundësinë ekonomike që të shkojë, ushqehet dhe të flejë në Ersekë. Madje, edhe duke improvizuar edhe ndonjë shfaqje të vogël për banorët e paktë që kanë ngelur në atë vend. Por, humoristi ka akorduar 856 mijë lekë të reja, ose duke i shtuar TVSH-në shuma shkon në rreth 10 milionë lekë të vjetra.

Objekti i kontratës është “përzierje ushqimesh”, teksa kolegët e humoristit duhet të kenë edhe gusto në ushqim. Por, përse me lekët e taksave? Fare mirë mund t’ia gjente vendin këryre lekëve dhe të kursente ndonjë lekë nga rroga e tij e vogël, siç kurseu për lekët që bleu shtëpinë te Kodra e Diellit.

Rruga Press