Gjenerali i njohur thotë se SHBA ka bërë 9 teste të armëve hipersonike ndërsa Kina bën qindra

“Kina së shpejti do të kalojë Rusinë dhe SHBA-në nëse ne nuk bëjmë diçka”, thotë gjenerali Hyten

Shkathtësia në rritje ushtarake e Kinës është “mahnitëse” dhe përparimi i saj në fushën e raketave hipersonike është një çështje shqetësuese, tha të enjten një gjeneral i lartë amerikan, përcjell Rruga Press.

“Në pesë vitet e fundit, ndoshta më gjatë, Shtetet e Bashkuara kanë bërë nëntë teste hipersonike. Në të njëjtën kohë, kinezët kanë bërë qindra, “tha nënkryetari i shefave të përbashkët të shtabit, gjenerali John Hyten. “Shifrat njëshifrore kundrejt qindrave nuk është një pozitë e mirë.”

“Tani kjo nuk do të thotë që ne nuk po ecim shpejt në procesin e zhvillimit të hipersonikëve. Ajo që vërehet është se qasja jonë ndaj zhvillimit është thelbësisht e ndryshme,” shtoi ai, sipas Washington Examiner. “Të quash ritmin e Kinës kërcënim është një term i dobishëm sepse ritmi me të cilin po lëviz Kina është mahnitës.”

“Ritmi që ata po lëvizin dhe trajektorja në të cilën ata po ecin do të kalojë Rusinë dhe Shtetet e Bashkuara nëse ne nuk bëjmë diçka për ta ndryshuar atë,” tha ai, duke shtuar se çdo element i ndërtuar nga Kina është për të sfiduar SHBA-në dhe aleatët tanë.

Krahas kësaj, tha gjenerali Hyten, rritja ushtarake e SHBA-së është penguar për shkak të burokracisë. “Nuk janë vetëm Shtetet e Bashkuara, por Shtetet e Bashkuara dhe aleatët tanë, sepse kjo është gjëja që ndryshon vërtet lojën,” tha ai. “Nëse janë vetëm Shtetet e Bashkuara, do të jetë problematike në pesë vjet. Por nëse janë Shtetet e Bashkuara dhe aleatët tanë, mendoj se mund të jemi mirë për një kohë.”

Zoti Hyten do të dalë në pension muajin e ardhshëm, por Shtëpia e Bardhë nuk e ka emëruar ende pasuesin e tij. Zëvendëskryetari ka paralajmëruar se personi që e zëvendëson duhet të “përqendrohet tek shpejtësia dhe të rikthejë shpejtësinë përsëri në procesin e Pentagonit”.

Vërejtjet erdhën disa ditë pasi Kina testoi kapacitetet hapësinore me një raketë hipersonike që mund të rrethojë globin përpara se të godasë objektivin e saj, një përpjekje për t’iu shmangur mbrojtjeve raketore amerikane, sipas ekspertëve.

Kina ka mohuar testimin e një rakete hipersonike dhe e ka quajtur atë një anije kozmike, por oficeri i lartë ushtarak amerikan, gjenerali Mark Milley, të mërkurën dha konfirmimin e parë zyrtar të SHBA-së për një test të armëve hipersonike kineze.

Duke e quajtur atë “shumë afër” një momenti të Sputnik-ut, Milley tha: “Ajo që pamë ishte një ngjarje shumë domethënëse, një testim i një sistemi të armëve hipersonike. Dhe është shumë shqetësuese.”

Gjenerali Hyten gjithashtu targetoi Rusinë në komentet e tij dhe e quajti atë kërcënimin më të afërt për SHBA-në, duke përmendur 1500 armët e saj bërthamore të vendosura.

Uashingtoni është në një garë të ngushtë me Kinën dhe Rusinë, por mbetet prapa në aspektin e aftësive ushtarake pasi të dy vendet kanë demonstruar aftësi të avancuara duke testuar raketa hipersonike.

Nëse përballen me kërcënimin e një sulmi në shkallë të gjerë nga Rusia dhe Kina, SHBA do të humbasë situatën luftarake, një shqetësim që shprehet gjithnjë e më shumë nga zyrtarët më të lartë ushtarakë të Uashingtonit tani.

Rruga Press