Kuqezinjtë e Kombëtares, sot drejt Hungarisë

Kuqezinjtë e Shqipërisë janë nisur mëngjesin e sotëm drejt Hungarisë, ku të shtunën në mbrëmje do të zhvillojnë ndeshjen e saj të radhës, por shumë të rëndësishme, për eliminatoret e Botërorit “Katar 2022” përballë vendasve.

Pritet me mjaft interes kjo ndeshje, sidomos pas dy rezultateve të fundit që kemi arritur në ndeshjet e zhvilluara në “Elbasan Arena”, ku morëm 6 pikë, me Hungarinë dhe San Marinon.

Këto dy rezultate na bën të renditemi aktualisht në vendin e dytë në grup, duke i dhënë një tjetër peshë dy ndeshjeve që kemi në këtë fazë me Hungarinë më 9 tetor dhe Poloninë më 12 tetor.

Në ndeshjen që do të zhvillohet, nesër, në “Pushkash Arena” të Budapestit, një ndër avantazhet në letër për skuadrën tonë Kombëtare është mungesa e tifozëve, pasi Federata Hungareze e Futbollit është penalizuar me dy ndeshje pa tifozë, për shkak të racizmit të shfaqur ndaj Anglisë.

Por se si do të luajnë kuqezinjtë mbrëmjen e nesërme, do të na duhet të presim koferencën për shtyp që do të japë sot në mbrëmje nga Budapesti trajneri Edi Reja dhe ku pas saj do të zhvillohet edhe seanca e fundit stërvitore në stadiumin e ndeshjes.

Rruga Press