Kosova miraton masat e reja anti-covid, nga dita e sotme hyrja në lokale dhe ambiente të mbyllura vetëm me dëshmi të vaksinës dhe testit negativ

Duke nisur nga dita e sotme, sektori i gastronomisë në Kosovë do të lejohet të shfrytëzojë hapësirat e brendëshme vetëm pasi klientët të kenë paraqitur një dëshmi vaksinimi ose test negativ për covid.

Masa është marrë pas rritjes së numrit të të infektuarve. Ministria e Shëndetësisë në Kosovë ka bërë me dije se verifikimi i dëshmive të vaksinimit dhe testeve mund të bëhet me anë të formës elektronike, përmeskodit QR. Për bizneset që shkelin masat anti-covid, Agjencia e ushqimit dhe Veterinarisë ka njoftuar se nuk do të ketë tolerime.

Përpos gastronomisë, që deri më sot është lejuar të punojë vetëm në ambiente të hapura, sipas vendimit të fundit të qeverisë, çertifikatën e vaksinimit do të duhet ta paraqesin edhe punonjësit e e institucioneve shtetërore e private, si qendrat tregtare e call center-at e të gjithë punonjësit të cilët kanë kontakt të përditshëm me palë të tjera. Shkollat dhe çerdhet, të cilat nisin aktivitetin e tyre nga dita e sotme dhe ambientet e aktiviteteve sportive, në të cilat do të lejohen të pranishëm vetëm për 10% të kapacitetit të ambienteve të brendshme, do të duhet gjithashtu të paraqesin certifikatën e vaksinimit ose një nga dëshmitë alternative si testi PCR, serologjik ose ai rapid antigjen.

Kosova ka regjistruar plot 159.870 raste me COVID-19, prej tyre 152.758 janë shëruar, 4.176 raste janë aktive, ndërsa 2.936 kanë vdekur, në periudhën kohorë prej 13 marsit 2020 e deri 26 shtator 2021. Ndërkohë, 500 mijë qytetarë kanë marrë dy doza të vaksinës deri ditën e djeshme.

Rruga Press