Vdekja e minatorit në Bulqizë, policia arreston drejtuesin teknik, në hetim dhe tekniku i minierës
Policia njoftoi të hënën se ka arrestuar drejtuesin teknik të subjektit minerar, ku humbi jetën i bllokuar në galerinë e kromit minatori 60-vjeçar Muharrem Plaku.
Nën hetim u vu dhe tekniku i minierës, sipas policisë, akuzuar për veprën penale të shkeljes së rregullave të mbrojtjes në punë.
Autoritetet njoftuan për mediat se “shtetasit e lartëpërmendur kanë patur detyrimin ligjor për kontrollin e vazhdueshëm të gjendjes teknike të galerisë, ku si pasojë e neglizhencës së tyre, mesditën e datës 15.09.2021, në një nga nënkatet e një subjekti minerar, është shembur një masiv materiali dhe për pasojë ka humbur jetën 60-vjeçari punëtor në minierë.
Trupi i pajetë i minatorit të zënë në galeri u gjet ditën e sotme pas pesë ditësh kërkime.
Zëvendës ministri i infrastrukturës dhe Energjitikës, Ilir Bejtja deklaroi se është ngritur një grup i posaçëm që do të verifikojë se si masivi i kromit që dyshohet se u shkëput nga tavani i minierës bllokoi brenda 60-vjeçarin.
Rruga Press