Britania mbështet përpjekjet e Kosovës për identifikimin e mbetjeve mortore në Zubin Potok

Mbretëria e Bashkuar ka shprehur mbështetjen për familjet e personave që ende figurojnë të zhdukur nga lufta e viteve 1998-1999 në Kosovë, duke mirëpritur punën e institucioneve kosovare për gjetjen dhe identifikimin e mbetjeve mortore në Zubin Potok.

Ambasada e Mbretërisë së Bashkuar në Kosovë, në një reagim në Facebook ka thënë se qëndron pranë familjeve të personave të zhdukur dhe mbështet përpjekjet për zbardhjen e fatit të tyre, pas shumë vitesh pasigurie.

“Mbretëria e Bashkuar qëndron me familjet e atyre që ende janë të zhdukur nga konflikti i viteve 1998-1999 dhe mbështet përpjekjet për të gjetur përgjigje për ta, pas shumë vitesh pasigurie”, thuhet në reagim.

Londra ka mirëpritur punën e autoriteteve të Kosovës për gjetjen e mbetjeve mortore në komunën e Zubin Potokut, si dhe ekzaminimet forenzike dhe testimet e ADN-së që synojnë identifikimin e tyre.

Ndërkohë, kryeministri në detyrë i Kosovës, Albin Kurti, ka deklaruar të hënën se mbetjet mortore të gjetura gjatë gërmimeve në Zubin Potok përkojnë me atë që njihet si “Grupi i intelektualëve”, i zhdukur në veri të Kosovës gjatë luftës.

Kurti ka bërë të ditur se gërmimet, të cilat zgjatën katër javë, kanë përfunduar me gjetjen dhe zhvarrosjen e mbetjeve mortore që vlerësohet se u përkasin së paku 23 personave.

Sipas Kurtit, këta persona dyshohet se janë viktima të zhdukjes me dhunë gjatë luftës së fundit në Kosovë.

“Numri 23 përkon me atë që njihet si ‘Grupi i intelektualëve’, të cilët më 19 prill të vitit 1999 u ndaluan, u rrëmbyen dhe u pushkatuan nga forcat armike të Serbisë, që u përpoqën të fshehin dhe të zhdukin gjurmët e këtij krimi gjenocidal”, ka deklaruar Kurti.

Megjithatë, identifikimi përfundimtar i mbetjeve mortore pritet të kërkojë edhe disa muaj, pasi ato duhet t’i nënshtrohen ekzaminimeve forenzike dhe analizave të ADN-së.

Komisioni Qeveritar për Persona të Zhdukur prezantoi të hënën në Prishtinë raportin lidhur me procesin e gërmimeve në Zubin Potok.

Rruga Press