Mihali: Bllokada e opozitës për presidentin synon çuarjen e vendit në zgjedhje

Dejona Mihali, ka reaguar për situatën politike në vend dhe procesin e zgjedhjes së presidentit, duke akuzuar partitë opozitare se po synojnë bllokimin e institucioneve për të çuar vendin drejt zgjedhjeve të reja.

Në një status publik, Mihali thekson se Vetëvendosje nuk bën “lojëra politike” dhe se në çdo moment ka marrë përgjegjësitë e saj politike, qoftë në protesta, në opozitë apo në qeverisje. Sipas saj, problemi aktual nuk lidhet me emrin e kandidatit për president, por me qëndrimin e opozitës për të mos marrë pjesë në proces.

Ajo pretendon se PDK ka kërkuar një marrëveshje politike pa emër konkret për presidentin, por me kushtin që kandidati të vijë nga radhët e saj dhe të votohet nga deputetët e Vetëvendosjes, gjë që sipas saj nënkupton synimin për zgjedhje të reja. Ndërkohë, Mihali thotë se edhe LDK nuk ka qëndrim të unifikuar brenda grupit parlamentar dhe nuk mund të garantojë votat e deputetëve të saj.

Sipas saj, edhe AAK nuk ka mbështetje për kandidatin e propozuar nga kjo parti dhe nuk është e gatshme të qëndrojë në seancë për kandidatë të tjerë. Mihali shton se disa segmente të opozitës, me në krye PDK-në, po llogarisin se përsëritja e zgjedhjeve mund të ulë mbështetjen për Vetëvendosjen.

Në fund, ajo thekson se sipas saj tema nuk është kandidatura për president, por përpjekja për të dobësuar shumicën politike të Vetëvendosjes dhe për t’u rikthyer tek, siç e quan ajo, “avazi i vjetër” i qeverisjes. Mihali bën thirrje që të respektohet vullneti i qytetarëve dhe rezultati i zgjedhjeve që i dha shumicën Vetëvendosjes dhe kryeministrit Albin Kurti.

Rruga Press