Fshati Tapi në Kuçovë zhytet në baltë dhe ujë prej 25 vitesh, Bashkia: Nuk ka fonde për rrugën

Fshati Tapi, vetëm 5 km nga qendra e qytetit të Kuçovës, jeton në kushte që banorët i përshkruajnë si “si në kohën e mesjetës”.

Rrugët janë të mbushura me ujë, baltë dhe llucë, duke e bërë lëvizjen e përditshme të banorëve jashtëzakonisht të vështirë.

Banorët tregojnë se fëmijët e kopshteve dhe shkollave janë të detyruar të veshin çizme për të arritur në rrugën kryesore, ndërsa të rriturit mbajnë këpucët në çantë dhe veshin çizmet vetëm për të kaluar rrugën e fshatit.

“Jetojmë të mbuluar nga pluhuri në verë dhe të zhytur në baltë e llucë në dimër. Bashkia na ka harruar plot 25 vite,” thonë banorët, të cilët shprehen se kanë bërë shumë herë ankesa për rikonstruksionin e rrugës, por premtimet elektorale nuk janë përmbushur kurrë.

Nga ana e saj, bashkia e Kuçovës ka deklaruar se momentalisht nuk ka fonde për të realizuar investimin.

Banorët apelojnë që situata të ndryshojë sa më parë, duke theksuar se rruga e fshatit Tapi ka më shumë se dy dekada në gjendje të papërshtatshme.

Rruga Press