Ilir Kërçeli: KB Prishtina duhet të mbetet klub i qytetit, jo instrument i politikës

Ilir Kërçeli ka reaguar për zhvillimet rreth Klubit të Basketbollit Prishtina, duke theksuar se klubi përfaqëson një vlerë qytetare dhe sportive që nuk duhet të nënshtrohet interesave politike. Sipas tij, përfshirja direkte e politikës në drejtimin e klubit rrezikon autonominë sportive, politizon vendimmarrjen dhe e shndërron sportin në mjet të interesave partiake.

Kërçeli ka nënvizuar se basketbolli ka qenë historikisht pjesë e pandashme e jetës së të rinjve në Prishtinë dhe se KB Prishtina është ndërtuar brez pas brezi si simbol i përpjekjes, këmbënguljes dhe krenarisë qytetare. Ai thekson se klubi nuk është pronë e politikës, por pasuri e qytetit dhe e qytetarëve të tij.

Duke folur për të ardhmen, Kërçeli ka bërë thirrje që KB Prishtina të udhëhiqet mbi parime të qarta të pavarësisë dhe profesionalizmit, me menaxhim të pavarur, transparencë financiare dhe përfshirje të komunitetit sportiv. Sipas tij, vetëm kështu klubi mund të mbetet një hapësirë bashkuese dhe një shembull i sportit të pastër, larg ndikimeve politike.

Statusi i plotë:

Klubi i Basketbollit Prishtina përfaqëson një vlerë qytetare dhe sportive që i tejkalon interesat politike. Përfshirja direkte e politikës në drejtimin e klubit rrezikon ta dëmtojë autonominë sportive, ta politizojë vendimmarrjen dhe ta shndërrojë klubin në mjet të interesave partiake. Sporti duhet të mbetet hapësirë bashkuese, ku konkurrenca, meritokracia dhe profesionalizmi janë parime themelore. KB Prishtina nuk është pronë e politikës, por pasuri e qytetit dhe e qytetarëve të tij.

Basketbolli ka qenë pjesë e pandashme e jetës së të rinjve në Prishtinë. Që nga fëmijëria, çdo i ri është rritur duke luajtur basketboll në shkolla, lagje dhe hapësira publike, duke e ndërtuar lidhjen me sportin në mënyrë të vazhdueshme. Ky rrugëtim, i formuar brez pas brezi, e ka bërë KB Prishtinën simbol të përpjekjes, këmbënguljes dhe krenarisë qytetare. Klubi është rezultat i një historie kolektive, jo i projekteve të përkohshme politike.

E ardhmja e KB Prishtinës duhet të ndërtohet mbi parime të qarta të pavarësisë dhe profesionalizmit. Klubi duhet të udhëhiqet nga struktura të pavarura, me menaxhim profesional dhe transparencë të plotë financiare. Përfshirja e komunitetit sportiv, investimi në të rinjtë dhe rregullat e qarta kundër politizimit janë garanci që KB Prishtina do të vazhdojë të jetë klub i qytetit dhe i sportit të pastër.

KB Prishtina është më shumë se një klub basketbolli, është histori, identitet dhe e ardhme.

Rruga Press