Aksion i Policisë në Leposaviq- sekuestrohen armë, municion dhe pajisje ushtarake

December 23, 2025 use3

Policia e Kosovës ka bërë të ditur se në stacionin policor në Leposaviq janë iniciuar dy raste për posedim të armëve, municion dhe pajisje ushtarake.

Sipas Policisë, më 19.12.2025, rreth orës 22:07, zyrtarët policorë nga Njësia për Ndërhyrje të Shpejtë, gjatë patrullimit në fshatin Rvatska kanë gjetur në një shtëpi të pabanuar një armë gjuetie, një karabinë, një armë të llojit AK-47, 240 fishekë dhe një palë dylbi. Të gjitha këto më pas janë sekuestruar.

Lexo më shumë Kurti: Në Gjakovë e kemi bazën e Forcës së Sigurisë së Kosovës dhe do ta ndërtojmë edhe fabrikën e municioneve, të parën në Kosovën tonë të lirë e të pavarur

Si rrjedhojë e procedurave hetimore, më 22.12.2025, zyrtarët policorë në objektet përcjellëse të shtëpisë kanë gjetur dhe sekuestruar edhe një pushkë ajrore, mekanizëm për barut, 1 thikë ushtarake dhe një fotroll për revole.

Lidhur me rastin, të gjitha veprimet janë ndërmarrë në koordinim me Prokurorin e Shtetit, i cili ka udhëzuar inicimin e rastit penal për veprën penale “Mbajtje në pronësi, kontroll ose posedim i paautorizuar i armëve”.

Aktualisht nuk ka persona të arrestuar dhe rasti është në procedurë hetimore.

Lexo më shumë Arben Vitia: Spitali i Mitrovicës pajiset me depo moderne të barnave, përmirësohet menaxhimi në shëndetësi publike

Në anën tjetër, për rastin e dytë, më 20.12.2025 rreth orës 06:45, Policia ka arrestuar personin R.R. (1965), pasi gjatë kontrollit në shtëpinë e tij në fshatin Veacev, Komuna e Leposaviqit, janë gjetur dhe sekuestruar: një pushkë gjuetie, një pushkë gjysmë automatike, një bombë dore, 2 tromblona, fishekë të kalibrave të ndryshëm, pajisje të ndryshme ushtarake (çantë, xhaketë, thikë, etj).

Me urdhër të Prokurorit të Shtetit, pas inicimit të rastit, i dyshuari është liruar në procedurë të rregullt.

Rruga Press