Arrestohet Federica Mogherini, dyshohet për mashtrim në projekte të BE-së

Autoritetet belge kanë arrestuar ish-shefen e diplomacisë evropiane, Federica Mogherini, nën dyshimin për mashtrim.

Së bashku me të është arrestuar edhe ish-sekretari i përgjithshëm i Shërbimit Evropian të Veprimit të Jashtëm (EEAS), diplomati italian Stefano Sannino.

Sipas Zyrës së Prokurorit Publik Evropian (EPPO), dyshimet lidhen me formimin e Akademisë Diplomatike të Bashkimit Evropian – një program trajnimi për diplomatë të rinj, i cili iu dha Kolegjit të Evropës në Belgjikë nga EEAS, gjatë periudhës 2021–2022, pas një procedure tenderimi.

Autoritetet po hetojnë nëse EEAS ka shkelur rregullat e tenderimit duke ndarë informacione me Kolegjin e Evropës para se projekti t’i jepej zyrtarisht këtij institucioni.

Në orët e mëngjesit është bastisur selia e Shërbimit Evropian të Veprimit të Jashtëm (EEAS), si dhe ndërtesa e Kolegjit të Evropës, i cili financohet pjesërisht nga institucionet e BE-së.

Zyra e Prokurorit Publik Evropian ka konfirmuar bastisjet dhe identitetin e personave të ndaluar.

Bastisje janë zhvilluar gjithashtu edhe në shtëpitë private të individëve të arrestuar. EPPO ka kërkuar këto veprime si pjesë e një hetimi për mashtrim të dyshuar në lidhje me një projekt trajnimi të financuar nga BE për diplomatë të rinj.

Federica Mogherini u emërua rektore e Kolegjit të Evropës menjëherë pasi përfundoi mandatin si shefe e diplomacisë evropiane.

Kolegji i Evropës është institut pasuniversitar i studimeve evropiane, me kampuse në qytetin Bruges të Belgjikës, në Varshavë të Polonisë, si dhe që nga viti i kaluar edhe në Tiranë.

Rruga Press