Vetëvendosje: Gjykata Kushtetuese shkeli Kushtetutën dhe uzurpoi kompetencat e Kuvendit
Lëvizja Vetëvendosje ka reaguar ashpër ndaj një njoftimi të publikuar sot nga Gjykata Kushtetuese, duke e cilësuar atë si “devijim të rrezikshëm nga roli kushtetues” dhe “shkelje të parimeve themelore të shtetit të së drejtës dhe ndarjes së pushteteve”.
Sipas VV-së, Gjykata Kushtetuese “nuk ka të drejtë të krijojë norma të reja juridike apo të imponojë rregulla që nuk kanë bazë në Kushtetutë”. Në reagim thuhet se “shpikja e rregullave tërësisht të reja në mes të procesit dhe ndërhyrja në mënyrë substanciale në kompetencat e Kuvendit është cënim i rendit kushtetues”.
Partia e Kryeministrit Kurti thekson se miratimi ose ndryshimi i Kushtetutës është kompetencë ekskluzive e Kuvendit ose e referendumit popullor, duke akuzuar Gjykatën se po “uzurpon rolin kushtetues të Kuvendit” dhe po vepron si “organ jashtëkushtetues”.
Në reagim ngrihet pyetja se mbi çfarë baze Gjykata ka vendosur që “grupi më i madh parlamentar ka të drejtë të propozojë të njëjtin kandidat vetëm tri herë”, duke e cilësuar këtë si normë të shpikur pa asnjë bazë kushtetuese apo doktrinare.
VV paralajmëron se Aktgjykimi që pritet të shpallet “do ta cënojë rëndë ndarjen e pushteteve” dhe përbën “rast të paprecedentë” të ndërhyrjes flagrante në kompetencat e Kuvendit. “Gjykata nuk mund të uzurpojë funksionin e hartimit apo amandamentimit të Rregullores së Kuvendit”, thuhet në reagim.
Partia e sheh vendimin e Gjykatës si të motivuar politikisht, duke pretenduar se herë pas here, kur Vetëvendosje duhet të veprojë sipas rregullave të vendosura më parë nga vetë Gjykata, “ato rregulla po i ndryshon vetë Gjykata”.
Po ashtu, VV e quan të panevojshëm dhe të motivuar politikisht fokusin e Gjykatës te Kryesuesi i seancës konstituive, Avni Dehari, duke thënë se ai “nuk është subjekt kushtetues, por vetëm i Rregullores së Kuvendit” dhe se etiketimi i tij “përdor fjalorin e partive opozitare”.
Reagimi përfundon me paralajmërimin se ky është “rrezik i një pushteti juridik të pakontrolluar, që në vend të kontrollit të pushteteve të tjera, vetë bëhet burim i kapjes institucionale”.
Rruga Press