Kurti: Në kohë rekord sanuan në masë të madhe dëmin e shkaktuar në Ibër Lepenc, çfarëdo sfide e tejkalojmë bashkë

Kryeministri i Kosovës, Albin Kurti ka thënë se në kohë rekord kanë sanuar në masë të madhe dëmin e shkaktuar në Ibër Lepenc.

Kurti gjithashtu ka pohuar se çfarëdo sfide tejkalohet së bashku, transmeton Telegrafi.

“Punë e jashtëzakonshme dhe përgatitje e lartë e institucioneve tona të cilat në kohë rekord sanuan në masë të madhe dëmin e shkaktuar në Ibër Lepenc. Çfarëdo sfide e tejkalojmë bashkë, e edhe ky sulm veçse shfaqi frymën e fuqishme të bashkëpunimit, kontributit e angazhimit të institucioneve tona”, ka pohuar ai.

Më herët, ministrja e Ekonomisë, Artana Rizvanolli ka njoftuar se pas një angazhimi të jashtëzakonshëm të institucioneve tona, është siguruar furnizimi i rregullt me energji elektrike për vendin dhe ngrohje qendrore për qytetarët e Prishtinës.

“Ibër Lepenci, rreth orës 02:00 pas mesnate, në një afat rekord, ka vendosur gjashtë tuba të përkohshëm me kapacitet të mjaftueshëm për të siguruar ujë për ftohjen e termocentralit “Kosova B”. Kësisoj, presim që furnizimi me energji elektrike të vazhdojë i pacënuar. Në të njëjtën kohë, jemi koordinuar me Korporatën Energjetike të Shqipërisë për të siguruar energji shtesë për të evituar reduktime eventuale. Nga ky akt terrorist është ndikuar edhe furnizimi me ujë”, ka pohuar ajo.

Ministrja gjithashtu njoftoi se në Prishtinë furnizimi me ujë do të kompensohet nga Badovci dhe Batllava, furnizimi në Fushë Kosovë, Drenas dhe rajonin e Mitrovicës do të sigurohet përmes autobotëve, duke nisur nga mëngjesi i sotëm.

Rruga Press