NATO kërkon rritjen e prodhimit të armëve në Ukrainë

Zyrtarët e mbrojtjes nga Gjermania, Franca, Polonia, Italia dhe Britania e Madhe u takuan sot në Berlin për të diskutuar masat për forcimin e sigurisë dhe mbrojtjes në Evropë.

“Gjermania dhe vendet e tjera të NATO-s kanë planifikuar të rrisin prodhimin e armëve brenda Ukrainës – në përgjigje të veprimeve të përshkallëzuara të Rusisë në luftë”, tha ministri gjerman i Mbrojtjes, Boris Pistorius.

“Zhvillimi dhe prokurimi i dronëve të kontrolluar nga inteligjenca artificiale është një prioritet, si dhe bashkëpunimi më i mirë për të ndihmuar në prodhimin e municioneve”, tha ai.

Ai tha se pushtimi rus i Ukrainës kishte marrë një dimension ndërkombëtar, duke iu referuar rreth 10 000 ushtarëve nga Koreja e Veriut që presidenti rus Vladimir Putin ka dislokuar në vend për të trajnuar dhe luftuar në Ukrainë.

“Sulmi i Rusisë ndaj Ukrainës me një raketë të re me rreze të mesme veprimi, e cila ka implikime sigurie për të gjithë Evropën, luajti një rol gjatë diskutimeve”, tha Pistorius.

Ministri gjerman i Mbrojtjes tha se veprimet ruse në Ukrainë preknin njerëzit në Gjermani dhe vendet e tjera të NATO-s.

“Kërcënimet ruse gjithmonë drejtohen ndaj nesh në të njëjtën kohë”, tha ai.

Pistorius tha se pavarësisht nëse 2%, 2,5% ose 3% e produktit të brendshëm bruto (PBB)do të shpenzohej për mbrojtjen në të ardhmen, qëllimi i vendeve të NATO-s ishte të mbyllnin boshllëqet e aftësive për të siguruar parandalim efektiv.

Ministri francez i Mbrojtjes, Sébastien Lecornu tha se Franca do t’i dorëzonte Ukrainës sistemin e mbrojtjes ajrore me rreze të shkurtër veprimi “Mistral” në javët e ardhshme.

“Ne duhet të mendojmë për qasjen tonë ndaj sigurisë dhe mbrojtjes gjatë 10-15 vitet e ardhshme”, tha ai.

“Objektivi i shpenzimeve prej 2% të NATO-s duhet të përmbushet, por mbetet gjithashtu e rëndësishme që paratë të përdoren siç duhet”, tha Lecornu.

Ministri polak i Mbrojtjes, Wladysław Kosiniak-Kamysz tha se vendi i tij do të shpenzonte 4,2% të PBB-së së tij për mbrojtjen këtë vit dhe se kjo shifër do të rritej në 4,7% vitin e ardhshëm.

“Sot ne po përballemi me kërcënimin më të madh që nga Lufta e Dytë Botërore. Sot kemi ende kohë. Së shpejti koha do të mbarojë”, tha ai.

Rruga Press