Gjermania: Serbia shkeli qartë detyrimet e dialogut

Rishqyrtim të vendimeve që ditë më parë mori shteti serb lidhur me Kosovën, ka kërkuar Gjermania.

Për shtetin gjerman Projektligji i Serbisë për shpalljen e Kosovës zonë të mbrojtjes së veçantë dhe juridiksionin e veprave penale shkel qartë detyrimet e saj të dialogut.

Prandaj gjermanët i kanë kërkuar Serbisë të rishqyrtojë ato dhe të dyja vendet edhe Kosova edhe Serbia të zbatojnë marrëveshjen e Ohrit të vitit të shkuar pa vonesë duke përfshirë edhe asociacionin.

“Projektligji i Serbisë për shpalljen e Kosovës zonë të mbrojtjes së veçantë dhe për juridiksionin mbi veprat penale, shkel qartë obligimet e saj nga dialogu. I kërkojmë Serbisë që ta rishqyrtojë. Të dyja shtetet, Kosova dhe Serbia, duhet të zbatojnë marrëveshjen e Ohrit të vitit 2023 pa vonesë, duke përfshirë Asociacionin e komunave me shumicë serbe”, thuhet në reagimin e Ministrisë së Jashtme gjermane.

Bashkimi Evropian ishte i pari që reagoi për këto vendime të Serbisë duke i quajtur shkelje të qarta të obligimeve nga dialogu, me projektligjin e propozuar të qeverisë për shpalljen e Kosovës zonë të mbrojtjes së veçantë dhe për organizimin dhe juridiksionin e autoriteteve gjyqësore në ndjekjen e veprave penale në Kosovë.

Me deklarimin e BE-së u pajtua edhe Departamenti Amerikan i Shtetit që thanë se projektligji i Serbisë që pretendon juridiksion ligjor në Kosovë, shkel detyrimet e dialogut derisa kanë kërkuar nga të dyja shtetet, Kosova e Serbia zbatim të marrëveshjeve të arritura përfshirë edhe atë për Asociacionin e Komunave me shumicë serbe.

Rruga Press