Armë, municion, radio lidhje, policia tregon se çfarë konfiskoi në shtëpinë e një serbi në Zubin Potok

Policia e Kosovës ka dhënë detaje për aksionin e zhvilluar dje në Zubin Potok, ku një person u arrestua si dhe u konfiskuan disa armë.

Policia njofton se në shtëpinë e të dyshuarit serb ka gjetur armë dhe municion.

“Si rezultat i angazhimit dhe punës së zyrtarëve policor, gjatë kontrollit në shtëpinë e të dyshuarit mashkull kosovar janë gjetur dhe konfiskuar: Një armë e gjatë M-48, dy fishekë për pushkë gjuetie, katër telefona mobil, një Laptop, një Granad dore M-75 prodhim Jugosllav, një Radio lidhje “Baufeng” dhe një Jelek taktik. Ndërsa në shtëpinë e të dyshuarit tjetër po ashtu mashkull kosovar janë gjetur dhe sekuestruar: një pistoletë me karikator, “Zoraki 917-T”, një Kuti me katër (4) fishekë për pistoletë, një kapelë ma emblemë serbe dhe dy emblema me flamur serb”, thuhet në njoftimin e policisë.

Policia njofton se lidhur me rastin është arrestuar një i dyshuar dhe me vendim të prokurorit i dyshuari është dërguar në mbajtje.

Rruga Press