“Ishim të gatshëm ta japim jetën për ta mbrojtur Kosovën”, Osmani merr mesazhin nga ushtarët amerikanë

Presidentja e vendit, Vjosa Osmani, ka vizituar ushtarët amerikanë të cilët kanë shërbyer në Kosovë vitin e kaluar. Ajo po qëndron në Shtetet e Bashkuara të Amerikës prej disa ditësh.

Osmani ka thënë se Kosova është e bekuar që e ka mbështetjen e SHBA-së. 

“’Ne ishim të gatshëm ta japim jetën për ta mbrojtur Republikën e Kosovës’, është mesazhi që dëgjuam nga ushtarët amerikanë të Gardës Kombëtare të Teksasit, të cilët kanë shërbyer në Kosovë, pikërisht në kohën e sulmit të agresionit nga Serbia vitin e kaluar”, ka shkruar Osmani në Facebook.

Presidentja ka theksuar se SHBA-ja po i qëndron në krah Kosovës tash e 25 vjet.

“Gra e burra nga ushtria amerikane për 25-vjet shërbyen me devotshmëri për lirinë dhe paqen, e edhe sot vazhdojnë të qëndrojnë bashkë me ne në mbrojtje të shtetit dhe kufijve tanë. Prandaj dje i vizitova për t’ju shprehur falënderime në emër të popullit të Kosovës”, ka shkruar ajo.

Rruga Press