Rohde: Thirrja e Listës Serbe për bojkotin e votimit në veri është për keqardhje

Ambasadori gjerman, Jorn Rohde, ka thënë se nga votimi i të dielës në veri, nuk është arritur në situatën ku të gjithë qytetarët do të mund të ndihen të përfaqësuar nga kryetarët e komunave.

Ka deklaruar se thirrja e Listës Serbe për bojkotimin e këtij procesi është për keqardhje.

Ai në një përgjigje për KOHËN ka thënë se Qeveria e Kosovës e ka bërë pjesën e saj duke organizuar një proces të cilin votuesit do të mund ta kishin përdorur për të zgjedhur përfaqësuesit e tyre.

“Bojkoti i kërkuar nga akterët politikë si Lista Srpska është, siç e kam thënë më parë, për keqardhje dhe shkatërrues kur bëhet fjalë për kulturën demokratike, zgjidhjen e problemeve dhe kujdesin për jetën e përditshme aktuale të qytetarëve. Për ta thënë troç: ata që bënë thirrje për bojkot morën pikërisht atë që kërkuan”, thuhet ndër të tjera në përgjigje.

Qeveria ka vlerësuar se Kosova me organizimin e procesit të votimit për shkarkimin e kryetarëve në veri i ka përmbushur obligimet e saj dhe ka kërkuar nga Bashkimi Evropian (BE) që t’i heqë masat e vendosura ndaj Kosovës.

Të dielën në veri katër komunat në veri, Mitrovicë të Veriut, Zveçan, Leposaviq e Zubin-Potok është organizuar votimi për shkarkimin e kryetarëve. Por nisma e qytetarëve serbë ka dështuar.

Për shkarkim nevojitej vota pro e 50 për qind e trupës elektorale të një komune, plus një votë, por në fund të ditës mezi u mblodhën 250 vota në të katër komunat.

Sipas Komisionit Qendror të Zgjedhjeve, në Mitrovicë të Veriut kanë votuar 111 persona me të drejtë vote, në Leposaviq 124, në Zubin-Potok 18 dhe në Zveçan asnjë.

Rruga Press